पोखरा, २२ कार्तिक । ”आगामी मंसिर ४ गते हुने प्रतिनिधि तथा प्रदेश सभा निर्वाचन बहिष्कार गरौं” भन्दै मसाल जुलुस प्रदर्शन गर्ने नेत्र बिक्रम चन्द ‘विप्लव’ नेतृत्वको नेपाल कम्युनिष्ट पार्टीको विद्यार्थी संगठन अखिल (क्रान्तिकारी)का विद्यार्थी नेताहरु आज पोखरामा पक्राउ परेका छन् ।

दलाल संसदीय व्यवस्थाको चुनाव बहिष्कार गरौं भन्दै पोखरामा मसाल जुलुस प्रदर्शन गर्ने क्रममा पृथ्वीनारायण क्याम्पस अखिल क्रान्तिकारीका अध्यक्ष सचिन सि र अर्का विद्यार्थी दिनेश सापकोटालाई जिल्ला प्रहरी कार्यालय कास्कीको टोलीले पक्राउ गरेको हो । पक्राउ परेका विद्यार्थी नेताहरुलाई वडा प्रहरी कार्यालय बगरमा राखिएको छ ।

पक्राउ परेका विद्यार्थी नेताहरुलाई बिना शर्त तुरुन्त रिहा गर्न अखिल क्रान्तिकारीका केन्द्रीय सचिवालय सदस्य एवं गण्डकी प्रदेश इञ्चार्ज प्रकाश बास्तोला ‘मार्शल’ले माग गरेका छन् । उनले प्रहरी प्रशासनले जति सुकै धरपकड र दमन गरे पनि अहिलेको नाटकीय चुनाव खारेज गरेरै छाड्ने बताए ।

मसाल जुलुशका क्रममा विद्यार्थी नेताहरुले दलाल संसदीय व्यवस्था मुर्दावाद, वैज्ञानिक समाजवाद जिन्दावाद, लुटेराहरुले गर्न लागेको नाटकीय चुनाव खारेज गरौं, प्रहरी दमन मुर्दावाद, नेपाल कम्युनिष्ट पार्टी जिन्दावाद लगायतका नारा लगाएका थिए ।