पोखरा, १९ कार्तिक । नेकपा एमाले कास्की क्षेत्र नम्बर ३ का उम्मेदवारहरुले शनिबार पोखरा-२३ का विभिन्न स्थानमा घरदैलो कार्यक्रम गर्दै पुल बनाउनेदेखि खानेपानी ल्याउनेसम्मको काम गरेको भन्दै भोट मागेका छन् । प्रतिनिधी सभा सदस्यका उम्मेदवार दामोदर पौडेल (बैरागी) र क्षेत्र नम्वर ३ (ख) का प्रदेश सभा सदस्यका उम्मेदवार राजिव पहारीले सो क्षेत्रका स्थानियसँग भोट अपिल गर्दै त्यहाँ पुगेका हुन् ।

उम्मेदवारहरुलाई आफ्नों घर आँगनमा पाउँदा त्यस क्षेत्रका जनताहरु उत्साहित भएका थिए । उनीहरु स्वतःस्फुर्त घरबाट निस्किदै उनीहरुको घरदैलो कार्यक्रमलाई समेत साथ दिएका थिए । पोखरा २३ का स्थानियले सो क्षेत्रका निवर्तमान सांसद समेत रहेका राजिव पहारीले ३० वर्षदेखि पुल बनाउने आफुहरुको सपना साकार पारेको भन्दै फेरी पनि पहारीलाई नै उम्मेदवार पाउँदा खुसी लागेको बताएका थिए ।

बस्ती संरक्षणका लागि दिनरात र वर्षातको समेत प्रवाह नगरी जनसेवामा खटेका पहारीको योगदान आफुहरुले नबिर्सिएको घाँटिछिना, ठूलाखेतका स्थानियहरुको प्रतिक्रिया छ । त्यस्तै लामो समयदेखि निष्ठाको राजनीति गर्दै आएका दामोदर बैरागी विजयी भएपछि जनसेवामा पनि त्यसरी नै लाग्नेमा उनीहरुले विश्वास व्यक्त गरेका छन् ।

शनिबार उम्मेदवार बैरागी र पहारी वडा नम्बर २३ स्थित असलचौर, लोखलढुङ्गा, बाम्दी, निर्माने, खोरपाखा, चैनपुर, बाम्दी लगायतका स्थानमा पुग्दा त्यहाँका आमा समुह र युवा समुह लगायतले स्वागत गरेका थिए । यसअघि उम्मेदवारद्वय पहारी र बैरागीले शुक्रबार पोखरा–२४ स्थित कास्कीकोट, पामे, लौरुक, कार्कीको तहरा, खोरियापानी, गैह्रावारी, मौला,पाटेस्वाँरा, लौसिवोट, खड्गाउँ लगायका स्थानहरुमा घरदैलो गरेका थिए ।