काठमाडौं, १७ कार्तिक । नेक्रविक्रम चन्द ‘विप्लव’ नेतृत्वको नेपाल कम्युनिष्ट पार्टी निकट युवा संगठनका केन्द्रीय महासचिव सावित्री अधिकारी ‘विदुषी’ माओवादी केन्द्रमा प्रवेश गरेकी छिन् ।

आज माओवादी केन्द्रका अध्यक्ष पुष्पकमल दाहाल ‘प्रचण्ड’को खुमलटारस्थित निवासमा आयोजित कार्यक्रममा महासचिव विदुषीसहित केही युवाले विप्लव नेतृत्वको नेकपा परित्याग गरी पार्टी प्रवेश गरेका थिए ।

विप्लव नेतृत्वको पार्टी यस अघि दुई टुक्रामा परिणत भईसकेपछि कमजोर बन्दै गईरहेको नेकपाका नेता तथा कार्यकर्ताहरु धमाधम पार्टी परित्याग गर्दै माओवादी मैं फर्किन थालेका छन् । स्रोतका अनुसार अझै ठुलो पंक्ति छिट्टै नै विप्लव नेतृत्वको नेकपा परित्याग गरी माओवादी केन्द्रमा प्रवेश गर्दैछन् ।

युवा संगठनका केन्द्रीय महासचिव सावित्री अधिकारी ‘विदुषी’ माओवादी केन्द्रका अध्यक्ष प्रचण्डसँग पार्टी प्रवेश गरेपछि

यस अघिको स्थानीय चुनावलाई उपयोग गर्ने नीति अवलम्बन गरेपछि विप्लव नेतृत्वको पार्टी दुई टुक्रा हुन पुगेको थियो । अहिले प्रतिनिधि तथा प्रदेश सभाको चुनावलाई बहिष्कार र विथाल्ने कार्यक्रमहरु सार्वजनिक भएसँगैं नेतृत्व तह आफैंमा अलमल देखिएको भन्दै नेता तथा कार्यकर्ताहरुमा वितृष्णा बढ्न थालेको नेकपाका नेताहरुले नै खुलेआम बहस गर्न थालेका छन् ।