तनहुँ, ४ कार्तिक । तनहुँको बन्दीपुर गाउँपालिका–३ सिस्नेघारीमा चितुवाको आक्रमणबाट आज बिहान एक बालिकाको मृत्यु भएको छ । विहान ६ः३० बजे चितुवाको आक्रमणमा परी ११ वर्षीय विना चेपाङको मृत्यु भएको जिल्ला प्रहरी कार्यालय तनहुँले जानकारी दिएको छ ।

बालिकाका बुबा चन्द्र बहादुर घर्ती सुन्तला बेच्न डुम्रे बजार झरेका र आमा चन्द्रमाया घरमै काम गरिरहेका बेला सानिआमाको घरमा जाने क्रममा ती बालिकालाई सालघारीमा चितुवाले आक्रमण गरेको थियो । यस अघि पनि गत असारमा बन्दीपुर गाउँपालिका वडा नं. १ र ४ मा चितुवाको आक्रमणमा परी पाँच वर्षीय बालक सुप्रिम बगालेको मृत्यु भएको थियो भने आठ बर्षीया रियाना थापा र ३५ बर्षीया भिमलाल गरञ्जा घाइते भएका थिए ।

चितुवाको आक्रमणबाट पछिल्लो पाँच वर्षको अवधिमा १२ बालबालिकाले ज्यान गुमाएका छन्। चितुवाको आक्रमणबाट ज्यान गुमाउनेमा १२ वर्ष भन्दा कम उमेरका बालबालिका रहेका छन् ।