काठमाडौँ, २१ असोज । बर्षाका कारण पहिरो जाँदा चन्द्रागिरी नगरपालिका वडा नं. २ देउरालीमा रहेको रेकी ध्यान केन्द्रमा सुतिरहेका एकै परिवारका तीनजनाको मृत्यु भएको छ । राति १२ः४० बजे गएको पहिरोमा परी उनीहरुको मत्यु भएको चन्द्रागिरी नगरपालिका वडा नं. २ का वडाध्यक्ष भाइकृष्ण तामाङले जानकारी दिएका छन् ।

यसरी मृत्यु हुनेहरुमा काभ्रे धुलिखेल–१२ का स्थानीयवासी ५१ वर्षीय राजु श्रेष्ठ‚ उनकी श्रीमती ४५ वर्षीया रेखा श्रेष्ठ र छोरी डेढ वर्षीया सारथी श्रेष्ठ रहेका छन् । उनीहरु केही समयदेखि बिरामी भएका कारण उपचारका लागि उक्त ध्यान केन्द्रमा बस्दै आएका थिए ।

शुक्रबार बिहान ६ः४० बजे मेसिन लगाएर शव निकालिएको थियो । स्थानीय जनप्रतिनिधि र स्थानीयको सहयोगमा नागढुंगा प्रहरी प्रभाग‚ सशस्त्र प्रहरीको नीलबाराही गण र नेपाल प्रहरीको टोली उद्धार कार्यमा खटिएको थियो ।