पोखरा, १० साउन । जनप्रिय बहुमुखी क्याम्पस पोखरा–८, सिमलचौरमा एमफिल/पिएचडीको योग्यतालाई प्राथमिकता दिदैं क्याम्पस प्रमुखका लागि यहीँ साउन ३ गते दरखास्त आह्वान गरिएको विषयलाई लिएर चलखेल गर्न सञ्चालक समितिका केही सदस्यहरुले गलत गतिविधिहरु गरेको भन्दै अध्यक्ष तारा गिरीले आपत्ति व्यक्त गरेका छन् ।

क्याम्पसको उन्नयन र श्रीवृद्धिलाई नरुचाउने, नाफामुखी निजी शिक्षण संस्थाहरू चलाउने केही शैक्षिक माफियाहरू, संस्थालाई परिवारवादको चङ्गुलमा राख्न खोज्ने, आर्थिक पारदर्शीता र सुशासनलाई धज्जी उडाउने, सीमित आत्माकेन्द्रित व्यक्तिहरूले सञ्चालक समितिको बैठक छिटो बस्नु प¥यो भन्दै केही सञ्चालक समितिका सदस्यहरूको घरघरमा गई हस्ताक्षर सङ्कलन गर्ने दुष्प्रयास भएको भन्दै अध्यक्ष गिरीले यस घटनाको निन्दा गरेका छन् ।
अध्यक्ष गिरीले आज एक प्रेस विज्ञप्ति जारी गर्दै भनेका छन्–‘ क्याम्पसको उन्नयन र श्रीवृद्धिलाई नरुचाउने, नाफामुखी निजी शिक्षण संस्थाहरू चलाउने केही शैक्षिक माफियाहरू, संस्थालाई परिवारवादको चङ्गुलमा राख्न खोज्ने, आर्थिक पारदर्शीता र सुशासनलाई धज्जी उडाउने, सीमित आत्माकेन्द्रित व्यक्तिहरूले सञ्चालक समितिको बैठक छिटो बस्नु प¥यो भन्दै केही सञ्चालक समितिका सदस्यहरूको घरघरमा गई हस्ताक्षर सङ्कलन गर्ने दुष्प्रयास घोर निन्दनीय छ ।’

जनप्रिय क्याम्पस जनस्तरबाट खोलिएको नाफारहित, सर्वसुलभ शुल्कमा गुणस्तरीय शिक्षा दिने उद्देश्यले स्थापित शैक्षिक केन्द्र हो । संस्थालाई राजनीतिक स्वार्थभन्दा माथि राखी, सुशासन, पारदर्शीता र जवाफदेहिताको पथमा अघि बढेको क्याम्पसमा अस्थिरता चाहने तत्वलाई निधेष गर्नु नै जनप्रियको शाख कायम राख्नु आजको आवश्यकता रहेको अध्यक्ष गिरीको भनाई छ ।

विज्ञप्तिमा यस क्याम्पसका सञ्चालक समितिका पूर्व तथा वर्तमान पदाधिकारी एवम् सदस्य, सल्लाहकार, सम्मानार्थ संरक्षक, संस्थापक प्राध्यापक, सिनेटर, अभिभावक, नागरिक समाजका अगुवा, राजनीतिक दलमा आवद्ध व्यक्तित्व, विद्यार्थी संघ र सङ्गठनहरू समेत सबैलाई क्याम्पसको गतिशिलताका लागि खबरदारी गर्न आह्वान गर्दै हल्ला र भ्रमका पछाडि नलाग्न समेत अध्यक्ष गिरीले अपिल गरेका छन् ।

पोखरामा विगत ३ दशकदेखि यस क्षेत्रका शिक्षाप्रेमी, समाजसेवी, नागरिक समाजका अगुवा, तत्कालीन श्रृजना युवा क्लव हालको श्रृजना विकास केन्द्रको अगुवाई एवम् विभिन्न सङ्घसंस्थाको सामूहिक पहलमा स्थापित र सञ्चालित जनप्रिय बहुमुखी क्याम्पस गण्डकी प्रदेशको मात्रै नभई राष्ट्रिय तथा अन्तर्राष्ट्रिस्तरमा परिचित शैक्षिक संस्था हो ।

क्याम्पसले विश्वविद्यालय अनुदान आयोग (युजिसी)बाट गुण मापन तथा प्रत्ययानको प्रमाणपत्र दुईपटक पाइसकेको छ । वि.सं. २०७२ र २०७३ मा शिक्षा मन्त्रालयबाट मुलुकभरिका सामुदायिक क्याम्पस मध्ये उत्कृष्ट क्याम्पसका रूपमा पुरस्कृत भएको थियो । आफ्नै स्वायत्त कार्यक्रम लागू गरी गुणस्तरीय उच्चशिक्षा दिँदै मानित विश्वविद्यालय उन्मुख यस जनप्रिय बहुमुखी क्याम्पसले शैक्षिक गतिविधि अब्बल रूपमा सम्पादन गर्दै आएको छ ।