काठमाडौं, २९ जेठ । आमजनता बिच इमान्दार अनि कडा प्रहरीका रुपमा चिनिएका पूर्वडीआईजी रमेश खरेलले काठमाडौं निर्वाचन क्षेत्र नम्बर–१ बाट चुनाव लड्ने घोषणा गरेका छन् । खरेलले आगामी संसदीय चुनाव लड्ने घोषणा गरेका हुन् ।

नेपाल सुशासन पार्टीले खरेललाई आगामी प्रतिनिधिसभा निर्वाचनमा उम्मेदवार बनाउने निर्णय गरेसँगै उनले प्रतिनिधिसभा सदस्यका लागि आफ्नो उम्मेदवारी रहने घोषणा गरेका हुन् । खरेल सुशासन पार्टीका अध्यक्षसमेत हुन् ।

यसअघि देशव्यापी रुपमा विभिन्न कार्यक्रमहरु गर्दै भ्रष्टाचार, वेथिति र गुन्डागर्दी लगायतको अन्त्यका लागि आवाज उठाउँदै आएका पूर्वडीआईजी खरेल पर्सा वा काठमाडौंबाट उम्मेदवार बन्ने तयारीका समाचारहरू सञ्चारमाध्यमहरुमा आएका थिए । यसैबिच उनले काठमाडौंबाट उठ्ने घोषणा सार्वजनिक गरेका छन् ।

नेपाली कांग्रेसका पूर्वउपसभापति प्रकाशमान सिंह २०७४ सालको संघीय निर्वाचनमा सोही क्षेत्रबाट विजयी भएपनि २०७९ को स्थानीय तह निर्वाचनमा काठमाडौंको मेयरमा उनकी श्रीमती सिजंना सिंहले नराम्रोसँग पराजय व्यहोर्नु परेको थियो । स्वतन्त्र उम्मेदवार बालेन शाहले झण्डै दोब्बरमतले सिंहलाई पराजित गरेका थिए ।

पछिल्लो समय स्वतन्त्र उम्मेदवारहरुको दवदवा बढ्दै गइरहेको अवस्थामा जनताले पार्टी भन्दा पनि व्यक्ति रोज्न थालेपछि यतिबेला ठुला राजनीतिक दलहरु पनि खुम्चिन बाध्य भएका छन् । नेपाल प्रहरीमा छँदा असाध्यै राम्रो छवि बनाएका पूर्वडिआईजी खरेलको उम्मेदवारीले पनि दलहरुमा तरङ्ग पैदा गरिदिएको छ ।