पोखरा । पोखरा महानगरपालिकाको ८० हजार १ सय ५४ मत गणना भईरहँदासम्म पनि मेयरको उम्मेदवारमा नेकपा (एकीकृत समाजवादी)का धनराज आचार्यले करिब ३५ सय मतको फराकिलो अन्तरले अग्रता लिईरहेका छन् । नेकपा एमालेका उम्मेदवार पूर्वमेयर कृष्ण थापा शुरुदेखि नै पछ्याई रहेका छन् ।

एकीकृत समाजवादीका आचार्यले ३२ हजार ४ सय ८० मत प्राप्त गरेका छन् भने एमालेका पूर्वमेयर थापाले २९ हजार ४१ मतले पछ्याई रहेका छन् । राष्ट्रिय प्रजातन्त्र पार्टी (हलो)का मेयरका उम्मेदवार शंकर खरालले ३ हजार ५ सय २० मत र स्वतन्त्र उम्मेदवार लौरो चिन्हका खड्कराज पौडेल गनेसले २ हजार २ सय ४९ मत प्राप्त गरेका छन् ।

यता, उपमेयरमा भने कांग्रेस र एमालेकी उम्मेदवारको कडा प्रतिस्पर्धा चलिरहेको छ । पछिल्लो मतगणना अनुसार एमालेकी उम्मेदवार मञ्जु गुरुङले २ सय ६२ मतले अग्रता लिएकी छिन् । एमालेकी मञ्जु गुरुङले ३३ हजार २ सय २१ मत प्राप्त गरेकी छिन् भने कांग्रेसकी रानाभाटले ३२ हजार ९ सय ५९ मत प्राप्त गरेकी छिन् । उपमेयरमा राप्रपा (हलो)की उम्मेदवार रञ्जना सेनले ३ हजार ४ सय ११ मत प्राप्त गरेकी छिन् ।