News Portal

ताजा शिर्षकहरु

चर्चित शिर्षकहरु

प्रमुख समाचार राजनीति

‘समृद्ध वडा बनाउन माओवादीलाई जिताउनै पर्छ’ : वडाध्यक्षका उम्मेदवार भानुभक्त अधिकारी

पोखरा, २५ वैशाख । पोखरा महानगरपालिका वडा नम्बर–१ का नेकपा माओवादी केन्द्रका वडाध्यक्षका उम्मेदवार वडालाई स्मार्ट वडाको रुपमा विकास गर्ने घोषणा गरेका छन् ।

शनिबार घरदैलोका क्रममा स्थानियको घरदैलोमा पुगेका उनले पोखरा–१ लाई स्मार्ट वडा बनाउने बताएका हुन् । उनले समृद्ध वडा बनाउन माओवादी (केन्द्र) बिजयी हुनुको विकल्प नरहेको बताए ।

उम्मेदवार अधिकारीले वडाबासीले युवा नेतृत्व खोजिरहेकाले आफू बिजयी हुनेमा विश्वस्त रहेको बताए । अहिलेका जनप्रतिनिधिहरुको रबैयाको कारण जनताले दुःख पाएको बताउँदै उनले जनतालाई स्थानीय सरकार महसुस हुने गरी काम गर्ने प्रतिबद्धता जनाए ।

उनले वडा न.१ मा बाटो, खानेपानी, सिंचाई, आवास, शिक्षा, भौतिक पूर्वाधार वातावरण मैत्री पुर्वाधार, स्वास्थ्य क्षेत्र साथै उत्पादनमुखि क्षेत्रमा परिणाममुखी काम गर्ने बताए ।
वडाध्यक्षका उम्मेदवार अधिकारीले वडावासीका समस्याहरु साथै शिक्षा, स्वास्थ्य, कृषिलगायतका क्षेत्रमा विकृति र विसंगति छाएको बताउँदै आफू निर्वाचित भएमा त्यस्ता विकृति, विसंगतिबिरुद्ध कडा कदम चाल्ने, सुशासन कायम गर्ने बताए ।

उनले सुकुम्बासीहरुलाई लालपुर्जा प्रदान गर्नका लागि आवश्यक कार्यहरु गर्ने प्रतिबद्धता ब्यक्त गरेका छन् । उनले भने,‘एकपटक मलाई मौका दिनुहोस् । तपाईंले हामीलाई मतदान गरेर बिजय गराएकोमा गर्व गर्न लायक काम गरेर देखाउने छौं ।’

उनले आफूसहित माओवादीका अन्य उम्मेदवारहरुलाई गोलाकार घेराभित्र रहेको हसियाँ हतौडा चिन्हमा मतदान गरी आफ्नो टिमलाई विजयी गराउन आग्रह गरे ।

पोखरा–१ मा माओवादी केन्द्रबाट वडाध्यक्षमा भानुभक्त अधिकारी, महिला सदस्यमा मीना कोइराला, दलित महिला सदस्यमा कल्पना दमाई तथा खुल्ला सदस्यमा रुद्रप्रसाद लुईटेल र धनबहादुर तामाङ उम्मेदवार छन् ।

प्रतिक्रिया