पोखरा । नेपाली काँग्रेसको तर्फबाट पोखरा-१६ को वडाध्यक्षका प्रत्यासी उमेद्वार सिफारिस गर्दा झूठ्ठा विवरण पेश गरी दावी पेश भएको रहस्य खुलेको छ । नेपाली काँग्रेस पोखरा १६ का सभापति अमृत शर्मा तिमिल्सिनाले आफूलाई प्राध्यापन समेतका अन्य व्यवसायमा रहेको र लोकप्रिय नेता भएको विवरण पेश गरेको भेटिएपछि त्यस्तो रहस्य खुलेको हो ।

यद्यपि उनले प्राध्यापन कहाँ र कति वर्ष गरेका छन् भन्ने कुराको प्रमाण केही पनि पेश गर्न सकेका छैनन् । वि.स. २०५२ साल विन्ध्यवासिनी माविबाट एसएलसी पास गरेका शर्माको शैक्षिक योग्यता त्योभन्दा बढी नभएको जानकारहरु बताउँछन् । शर्मा यातायात व्यवसायी हुन् । उनी केही समयअघि माओवादी कोटाबाट ट्याक्सी व्यवसायी समितिको सचिव बनेका थिए ।

गण्डकी प्रदेश सरकारका भौतिक पूर्वाधार, शहरी विकास तथा यातायात व्यवस्थामन्त्री कुमार खड्काका विश्वास पात्र मानिने शर्मा उनकै जोडबलमा वडाध्यक्षको आकाँक्षी बनेको राजनीतिक वृत्तमा चर्चा छ । त्यसो त मन्त्री खड्काले पोखरा १६ मा आफ्नो गुट बनाउने काममा शर्मालाई नै खटाएको समाचार स्रोतले बताएको छ । यद्यपि वडाभित्र मन्त्री खड्को गुट कमजोर बन्दै गएको छ ।

वडाका ७ आकाँक्षीमध्ये होमबहादुर बानियाँ, मदन बस्नेत, धर्मराज थापा, शिवराज देवकोटा र राधाकृष्ण गुरुङ समेतका ५ जना वडाध्यक्षका आकाँक्षीहरुले शनिबार विहान पूर्वमहाधिवेशन प्रतिनिधि पद्मसिंह गुरुङलाई भेटी सर्वसम्मत् उमेद्वार बनिदिन आग्रह गर्दै आफूहरुको दावी छाड्ने प्रतिबद्धता व्यक्त गरेका थिए । तर गुरुङले आफुनो वडाध्यक्ष बन्ने चाहना नभएको बताएर ५ जनाभित्र समहमति खोज्न आग्रह गरेको स्रोतले बतायो ।

पोखरा १६ मा मन्त्री खड्काइतरको समूह बलियो देखिएको अवस्थामा क्षेत्रले कसलाई उमेद्वार बनाउँछ भन्ने विषयलाई चासोपूर्वक हेरिएको छ । उता नेपाली काँग्रेस पोखरा नगर समितिले वडा नं. १६ बाट सिफारिस भएका ७ जना आकाँक्षीमध्ये शर्मालाई एकल उमेद्वारका रुपमा क्षेत्रमा सिफारिस गरेपछि वडाध्यक्षका अन्य केही आकाँक्षीले नगर सभापति सुरेन्द्र विजुक्छेलाई खबरदारी गरेका थिए ।

नगर सभापति विजुक्छेले डन न्यूजसँगको टेलिफोन वार्तामा भने–‘यस्तो झुट्टा विवरण पठाउने काम सरासर गलत हो । टिक (चिन्ह) लगाएर पठाउँदैमा हुँदैन । हामी त्यसलाई तुरुन्त बदर गरिदिन्छौं । अन्य अध्यक्षका दावेदारहरुले पनि गुनासो गर्नुभएको छ । हामी तत्कालै एक्सन लिन्छौं ।’