स्याङ्जा, ४ वैशाख । स्याङ्जाको वालिङ १२ डाँडाखर्कमा आज विहान १० बजे भएको जीप दुर्घटनामा परी ५ जनाको घटनास्थलमा मृत्यु भएको छ । घाईते भएका ६ जनामध्ये ४ जनाको अवस्था गम्भिर रहेको जिल्ला प्रहरी कार्यालय स्याङ्जाले जानकारी दिएको छ ।

जिल्ला प्रहरी कार्यालय स्याङ्जाका प्रहरी निरिक्षक परमराज थापाका अनुसार दुर्घटनामा परी एक बालकसहित पाँच जनाको मृत्यु भएको हो । जीप सडकबाट झण्डै एकसय मिटर तल खरबारीमा खसेको र जीप पल्टदैं गर्दा चिलाउनेको रुखमा गएर अड्किएको थियो । जीप डाँडाखर्कबाट वालिङ बजारतर्फ जान हिडेको थियो ।

डाँडाखर्कबाट वालिङ बजारतर्फ आउँदै गरेको ग १ ज ७३९९ नम्बरको जीप वालिङ नगरपालिका– १२ माथिल्लो डाँडाखर्क नजिक दुर्घटनाग्रस्त भएको हो । दुर्घटनामा घाइते भएका चालकसहित ६ जनालाई उपचारका लागि पोखराको गण्डकी मेडिकल कलेजमा पठाइएको प्रहरी निरीक्षक थापाले जानकारी दिए । प्रहरी निक्षिक थापाका अनुसार मृतक पाँच जनाको शव वालिङ प्राथमिकक स्वास्थ्य केन्द्रमा राखिएको छ ।

प्रत्यक्षदर्शी प्रकाश डुम्रेका अनुसार जीप दुर्घटनामा भएको ७/८ मिनेटमा नै गाउँलेहरु उद्धारका लागि घटनास्थलमा पुगेका थिए । एम्बुलेन्सलाई फोन गरेर त्यहाँ आईपुग्दा झण्डै ४५ मिनेट लागेको थियो । वालिङ, झोलुङ्गे र वायाँटारी सबै तिर फोन गरेर एम्बुलेन्स जुटाईएको स्थानीय डुम्रेले जानकारी दिए ।