काठमाडौं, १ वैशाख । निर्माणस्थलबाट निर्माण सामग्री मध्यरातमा चोरी गरेर बेच्ने एकजना इञ्जिनियरलाई प्रहरीले पक्राउ गरेको छ । निर्माणस्थलबाट निर्माण सामग्री गायब हुन थालेपछि निगरानी गरिरहेको प्रहरीले ठेक्का लिने इञ्जिनियरलाई चोरी भएका ‘प्लाइउड’सहित पक्राउ गरेको हो ।

महानगरीय प्रहरी वृत्त महाराजगन्जको टोलीले निर्माण कम्पनी हिरोज कन्स्ट्रक्सन एन्ड इन्जिनियरिङ प्रा.लि.का मालिक आर्यन भनिने वासुदेव पुडासैनीलाई २७ चैतमा बुढानीलकण्ठ क्षेत्रबाट पक्राउ गरेको थियो । जिल्ला अदालत काठमाडौंबाट ७ दिनको म्याद थप गरी प्रहरीले अनुसन्धान गरिरहेको छ ।

चोरीमा संलग्न हिरोज कन्स्ट्रक्सन एन्ड इन्जिनियरिङ प्रा.लि.का मालिक आर्यन भनिने वासुदेव पुडासैनी र सुरक्षा निकायका अधिकारीसँग

चोरीका सामान बेच्नेक्रममा उनलाई महानगरीय प्रहरी प्रभाग बुढानीलकण्ठले पक्राउ गरेको थियो । महाराजगन्ज वृत्तका अनुसार उनीविरुद्ध सातभन्दा धेरै निर्माणस्थलका निर्माण सामग्री चोरी गरेको आरोप लागेको छ । बुढानीलकण्ठ क्षेत्रका सातभन्दा धेरै निर्माणस्थलबाट निर्माण सामग्री चोरी भएको जाहेरी परेको छ ।

वृत्त प्रमुख डिएसपी प्रमेश विष्टका अनुसार निर्माणस्थलबाट निर्माण सामग्री रोडा, बालुवा, रड, फर्मा लागयत सामग्री गायब हुन थालेपछि परेको उजुरीका आधारमा प्रहरीले अनुसन्धान शुरु गरेको थियो । सधैँ चिल्लो कारमा हुइँकिने एक इन्जिनियर शंकाको घेरामा परेका थिए । प्रहरी अनुसन्धानमा जुट्यो । अन्ततः उनै इन्जिनियर चोरी भएका ‘प्लाइउड’सहित पक्राउ परे ।

सिभिल इन्जिनियर पुडासैनीले ठूला संरचना निर्माण र निर्माण भएका भवनको ‘इन्टेरियर डिजाइन’ गर्ने भन्दै ठेक्कमा लिन्थे । आकर्षक नक्सा बनाउँथे । निर्माणस्थलमा निर्माण सामग्री झार्न लागउँथे । दिउँसो गएर ‘स्टोर रुम’को रेकी गर्थे । भाडामा लिइएका ट्रक लिएर मध्यरात निर्माणस्थल पुग्थे । ‘स्टोर रुम’ खोल्न लगाउँथे । आवश्यकताअनुसार रड, बालुवा, रोडा, सिमेन्ट, फर्मालगायत सामग्री लोड गरेर आफ्नो गोदाममा लगि थन्काउँथे । केही समयपछि चोरीका तिनै सामग्री अन्य साइटमा लगेर बेचिदिन्थे ।