पोखरा, २७ चैत । नेकपा एमाले पोखरा वडा नंं. ५ का एक प्रभावशाली, पुराना कम्युनिष्ट नेता तथा लोकप्रिय जनप्रतिनिधि पुष्प बराल नेपाल कम्युनिष्ट पार्टी (एकीकृत समाजवादी)मा आज प्रवेश गरेका छन् । नेकपा एमालेबाट वडा नंं ५ को वडासदस्यमा अत्याधिक मतका साथ निर्वाचित जनप्रतिनिधि बराल स्थानीयस्तरमा राम्रो पकड भएका नेता मानिन्छन् ।

पोखरा–५, तल्लो कुलाको डिलस्थित स्मृतिमार्ग निवासी स्थानीय बराल सामाजिक कार्यमा एकदमैं अग्रणी भागमा खटिने र अबको स्थानीय चुनावमा एमालेका तर्फबाट वडाध्यक्षका सशक्त र लोकप्रिय दावेदारका रुपमा समेत परिचित थिए । जनताको हरेक खालका सुख र दुःखमा निडर भई निस्वार्थ सेवामा खटिने बराल समाजवादीमा प्रवेश गरेसँगै एमालेलाई ठुलो धक्का लागेको छ ।

जनप्रतिनिधिका रुपमा निर्वाचित हुनु अगाडिदेखि नै जनताका हरेक खालका समस्यामा दिनरात नभनि उभिने नेता बरालको त्यस क्षेत्रमा आफ्नै खालको प्रभाव र छवि रहेको छ । प्रष्ट र निडर वक्ताका रुपमा परिचित बरालले आज जारी गरेको प्रेस विज्ञप्तिमा एमालेमा व्यक्तिवादी चरित्र हावी हुँदै गएको, वेथिति, विकृति र विसंगति मौलाउँदै जाँदा आफूले पार्टी परित्याग गर्ने निष्कर्षमा पुगेको उल्लेख गरेका छन् ।

यस्तै प्रवृत्ति हावी हुँदै जाँदा एमालेमा रहेर अघि बढ्न सक्ने स्थिति नभएको हुँदा नेकपा एकीकृत समाजवादीमा प्रवेश गरेको विज्ञप्तिमा उल्लेख छ । २०३८ सालदेखि माले हुँदै कम्युनिष्ट पार्टीमा रहेर काम गरेका बरालले राजनीतिक जीवनमा धेरै उतार–चढाव व्यर्होदैं आएका छन् । प्रजातन्त्र, लोकतन्त्र र गणतन्त्रको आन्दोलनमा स्थानीयस्तरमा आन्दोलनको नेतृत्व गर्ने र सडकमा ज्यानको प्रवाह नगरी अग्रणी मोर्चामा खटिने बरालले एमाले परित्याग गरेसँगै निष्ठा र इमान्दारिताको राजनीति गर्ने पुराना नेताहरु देखि युवाहरुमा समेत निराशा छाउने र यसले स्थानीय निर्वाचनमा समेत प्रभाव पार्ने एमालेका नेताहरु बताउँछन् ।