पोखरा, १० चैत । स्कुल बसले स्कुटरलाई ठक्कर दिँदा आज (बिहीबार) बिहान एक युवकको मृत्यु भएको छ । आज विहान करिब ६ बजेतिर भएको दुर्घटनामा परी मृत्यु हुनेमा तनहुँ घर भई हाल पोखरा महानगरपालिका– १४ चाउथे बस्ने १९ वर्षीय किस्मत वाग्ले रहेको जिल्ला प्रहरी कार्यालय कास्कीले जानकारी दिएको छ ।

किस्मतले चलाइरहेको स्कुटर एक पैदलयात्री महिलालाई ठक्कर दिएर स्कुल बससँग ठोक्किएको थियो । जिल्ला प्रहरी कार्यालय कास्की प्रवक्ता डीएसपी सुन्दर तिवारीले भने–‘चाउथेबाट विजयपुरतर्फ आउँदै गरेको ग२२प ००७ नम्बरको स्कुटरले सुरुमा ३२ वर्षीया टेकमाया घर्तीलाई ठक्कर दियो । लगत्तै विपरीत दिशाबाट आइरहेको पोखरा १५, रामबजातस्थित गोल्डेन फ्युचर बोर्डिङ स्कुलको ग१क ९९६ नम्बरको बसमा ठोक्किन पुग्यो र उपचारका क्रममा अस्पताल लगेपनि उनलाई चिकित्सकले मृत घोषित गरे ।’

दुर्घटना लगत्तै घाइते भएका स्कुटर चालक वाग्लेलाई तत्कालै उपचारका लागि पश्चिमाञ्चल क्षेत्रीय अस्पतालमा पु¥याईए पनि चिकित्सकले मृत घोषणा गरेका थिए । उता, स्कुटरको ठक्करबाट घाइते भएका पैदलयात्री घर्तीको लेखनाथ सिटी अस्पताल शिशुवामा उपचारपश्चात् डिस्चार्ज भईसकेको छ ।