पोखरा, ८ चैत । जग्गा बेच्न नदिएको वाहनामा एक छोराले आफ्नै आमाको हत्या गरेका छन् । पोखरा महानगरपालिका–१२, शीतलादेवीकी ६७ वर्षकी नौमाया नेपालीको हत्या आरोपमा उनकै छोरा र साथी पक्राउ परेका हुन् ।

चैत ४ गते आफ्नै कोठामा मृत अवस्थामा भेटिएकी नौमायाको हत्या आरोपमा छोरा ३६ वर्षका ओमबहादुर नेपाली र ओमका साथी ३७ वर्षका कुमार गुरुङ पक्राउ परेको जिल्ला प्रहरी कार्यालय कास्कीले जानकारी दिएको छ ।

फागु पूर्णिमाको दिन ३ चैतमा ओम र उनका साथी कुमार गुरुङले सँगै मदिरा सेवन गरी घरमा पुगेर ढोका खोली प्यारालाइसिसको समस्या भएकी आफ्नी आमा नौमायाको हत्या गर्न साथी कुमारलाई ओमले कोठामा पठाएको प्रहरीको प्रारम्भिक अनुसन्धानबाट खुलेको छ ।

प्यारालाइसिसको समस्या भएकी वृद्धको कुमारले हत्या गरेपछि जबरजस्ती करणीको पनि प्रयास गरेको प्रहरीले बताएको छ । वृद्धको हत्या गरिसकेपछि साथी कुमारसँगै उनको डेरामा सुतेका छोरा ओमबहादुर भोलिपल्ट विहानमात्र घर फर्किएका थिए । आमाको हत्या गरेका छोराले नै प्रहरीलाई खबर गरेका थिए ।

ओमबहादुरले पोखरा महानगरपालिका–१२ स्थित आफ्नो घर र जग्गा बेच्न खोजेका थिए । तर आमा नौमायाले घरजग्गा बेच्न मानेकी थिइनन् । त्यसपछि माटेपानी बस्ने साथी कुमार गुरुङलाई एक लाख दिने शर्तमा आमाको हत्यामा सहयोग मागेको जिल्ला प्रहरी कार्यालय कास्कीका प्रवक्ता डीएसपी सुन्दर तिवारीले जानकारी दिए । ‘आमालाई मारिसकेपछि साथी गुरुङलाई जग्गा, घर बेच्ने र त्यसपछि एकलाख रुपैयाँ नगद दिन्छु भनेर भनेको रहेछ,’ सोमबार आरोपित सार्वजनिक गर्दै डीएसपी तिवारीले भने ।