पोखरा । कोरोना संक्रमणका कारण पोखरा महानगरपालिका वडा नं. ५ की ५९ वर्षीय महिलाको मृत्यु भएको छ । पोखरा स्वास्थ्य विज्ञान प्रतिष्ठान, पश्चिमाञ्चल क्षेत्रीय अस्पतालका निर्देशक सह.प्रा.डा. अर्जुन आचार्यले दिएको जानकारी अनुसार आईसियुमा उपचाररत ती महिलाको हिजो राती ११ बजे उपचारका क्रममा मृत्यु भएको हो ।

कार्तिक १४ गते कोभिड–१९ संक्रमण भई उपचारका लागि भर्ना भएकी ती महिलालाई सिभियर कोभिड–१९, निमोनिया साथै माइट्रल भल्व रिप्लेसमेन्ट गरिएको थियो । कोभिड–१९ पोजेटिभ भई प्रतिष्ठानमा उपचारका क्रममा मृत्यु हुने उनी २६ औं महिला हुन् । प्रतिष्ठानका निर्देशक सह.प्रा.डा. आचार्यले महिलाप्रति श्रद्धाञ्जली एवम् परिवारजनमा समवेदना व्यक्त गरेका छन् ।

त्यसैगरी, कोभिड–१९ संक्रमण भई उपचाररत ३ जना मध्ये २ जना होम आईसोलेसनमा र १ जना गण्डकी मेडिकल कलेजको आईसोलेसनमा रहने गरी डिस्चार्ज भएका छन् । पोखरा–३२ का ३३ वर्षीय महिला र २८ वर्षीय महिला होम आईसोलेसनमा रहने गरी डिस्चार्ज भएका हुन् । पोखरा–५, मालेपाटनका ६८ वर्षीय पुरुष गण्डकी मेडिकल कलेजमा आईसोलेसनमा रहने गरी डिस्चार्ज भएका हुन् ।