पोखरा, ८ असोज । वडाले सूचना जारी गरेर खोप लगाउनका लागि आह्वान गरेको भन्दा अघिल्लो दिन नैं राजनीतिक दलको आडमा सेटिङ मिलाएर राज्यको तोकेको मापदण्ड भन्दा विपरित फरक ढंङ्गले आफ्ना निकटकालाई धमाधम कोभिड खोप लगाएको आरोपमा नेकपा एमालेका एक कार्यकर्तालाई प्रहरीले पक्राउ गरेको छ ।

पोखरा महानगरपालिका वडा नं. १९ का रमेश केसीलाई वडा प्रहरी कार्यालय बगरले कोभिड खोपको अनियमितता गरेको आरोपमा पक्राउ गरेको हो । एमालेका कार्यकर्ता केसीले असोज ७ गते नै शहरी स्वास्थ्य चौकी पुरुन्चौरमा पुगी खोप वितरण गरेको स्थानीयले आरोप लगाएका थिए ।

वडाले असोज ७ गते सूचना जारी गर्दै ८ गतेका दिन वडाको तीन ठाउँमा ४५ वर्ष माथिका उमेर समूहका अघिल्लोपटक खोप लगाउन छुटेकाहरुलाई भेरोसिल खोपको पहिलो मात्रा वितरण गर्ने कार्यक्रम बनाएको थियो । तर केसीले तोकिएको मापदण्ड उल्लंघन गर्दै मनपरी आफ्ना निकटकालाई खोप लगाएपछि स्थानीय गाउँलेको गोप्य सूचनाको आधारमा प्रहरीले पक्राउ गरेको हो ।