पोखरां । भारी वर्षाका कारण कास्कीको लुम्ले र म्याग्दीको घोरेपानी क्षेत्र खतरामा परेको छ । जल तथा मौसम विज्ञान विभागको बाढी पूर्वानुमान महाशाखाले यी क्षेत्रहरुमा खतराको संकेत देखिएको भन्दै साईरन बजाएको छ ।

कास्कीको लुम्ले, चितवनको चरछरे, म्याग्दीको घोरेपानी र नवलपरासीको अरुण खोला स्टेशनमा भारी वर्षा मापन भएकाले खतराको संकेत स्वरुप साइरन बजाइएको जल तथा मौसम विज्ञान विभागको बाढी पूर्वानुमान महाशाखाले जनाएको छ ।

कास्कीको लुम्ले र म्याग्दीको घोरेपानी क्षेत्रमा थप वर्षा हुने सम्भावना भएकाले आकस्मिक बाढी आउने र पहिरो जाने सम्भावना रहेको जल तथा मौसम विज्ञान विभागको बाढी पूर्वानुमान महाशाखाले जनाएको छ । खतराको साईरन बजे लगत्तै गण्डकी प्रदेशका सुरक्षा निकायहरु ‘हाई अलर्ट’मा रहेका छन् ।गण्डकी प्रदेश प्रहरी प्रमुख डिआईजी घनश्याम अर्यालका अनुसार सुरक्षा निकायहरुलाई जोखिम क्षेत्रहरु वरपर ‘हाई अलर्ट’मा राखिएको छ ।

कास्कीको अन्नपूर्ण गाउँपालिकाका प्रमुख युवराज कुँवरका अनुसार बढि पानी पर्ने क्षेत्र भएकै कारण पनि लुम्ले जोखिममा भएकोले आफूहरु विहानैदेखि सर्तक अवस्थामा रहेको बताए । प्रमुख कुँवरले यतिबेला गाउँपालिका कैं वडा नं. ६ को ५०/६० घरपरिवारको वस्ती हाइजुङ गाउँ जोखिममा रहेको छ । त्यहाँ गाउँमाथिबाट पहिरो खस्न थालेको गाउँपालिकाका अध्यक्ष कुँवरले बताए ।

त्यसैगरी, अन्नपूर्ण गाउँपालिका कैं वडा नं. ७ मा रहेको विरेठाँटीमा हाइड्रो पावरका कारण खोला अव्यस्थित हुँदा नजिकैका वस्तीहरु जोखिममा रहेका छन् । खोला किनारका घरहरु र वस्ती जोखिममा रहेकोले त्यसतर्फ पनि गाउँपालिकाले सर्तकता अपनाउँदै जानकारीहरु दिएको उनले बताए ।

लगातारको वर्षाका कारण पहिरो खस्दा मध्यपहाडी लोकमार्ग अन्तर्गत पर्वत–बाग्लुङ खण्ड गए रातीदेखि अबरुद्ध बनेको छ । पर्वतको कुश्मा नगरपालिका वडा नं. १ सहर्षधारामा पहिरो खस्दा रातीदेखि नै सडक अवरुद्ध भएको हो । लगातारको बर्षा र पहिरो झरिरहेका कारण तत्कालै बाटो खुलाउन नसकिएको ट्राफिक प्रहरी कार्यालय पवर्तले जानकारी दिएको छ ।

यता, म्याग्दी र मुस्ताङ जोड्ने बेनी–मालढुङ्गा सडक समेत अवरुद्ध भएको छ । जलजला गाउँपालिका वडा नं. ८ नाङ्लीवाङको फर्से, वडा नं. ७ को केराबारी र वडा नं. ३ को लामाखेतमा पहिरो जाँदा गए राती देखि नै सडक अवरुद्ध भएको हो । दक्षित पर्वत जिल्लाको हुवास–वालिङ सडक र सदरमुकाम जोड्ने दक्षिण क्षेत्रका अधिकांश सडक अवरुद्ध भएका छन् । शनिवारदेखि परेको बर्षा नरोकिए पछि बाढी पूर्वानुमान महाशाखाले यी क्षेत्रहरुमा उच्च सतर्कता अपनाउन अनुरोध गरेको छ ।