पोखरा । कास्की क्षेत्र नं. ३ मा रहेका सम्पूर्ण स्वास्थ्य चौकीहरुमा स्वास्थ्य सामाग्री वितरण अभियान शुरु भएको छ । नेपाली कांग्रेसका नेता, पूर्वमन्त्री तथा नेपाल तरुण दलका पूर्व केन्द्रीय अध्यक्ष महादेव गुरुङको पहलमा अभियान शुरु भएको हो ।

भदौंरे, चापाकोट, सराङकोट र कास्कीकोटका स्वास्थ्यचौकीका प्रमुखहरुलाई स्वास्थ्य सामाग्री हस्तान्तरण गर्दै कांग्रेसका नेता गुरुङले अभियानको शुरुवात गरेका थिए । अभियानलाई काठमाडौंका तीनचुली नेपालका अध्यक्ष ज्वलन्त गुरुङले सहयोग प्रदान गरेका छन् ।

नेता गुरुङले महामारीको बेलामा जनताको दुःख र पीडामा मन मिलाउने उद्देश्यले जति सकिन्छ सक्दो सहयोग जुटाउन अभियान मार्फत् जनताको घरदैलोमा निस्किएको बताए । ‘यतिबेला आमजनता दुःख र पीडामा छन् । उनीहरुको जनजीविका नै ठप्प भएको छ,’ नेता गुरुङले भने–‘जति सकिन्छ सबैले इमान्दारिताका साथ पहल गरौं र यो महामारी विरुद्ध एक भएर लडौं ।’

अभियानका क्रममा प्रत्येक स्वास्थ्य चौकीलाई पिपिई, अक्सिमिटर, जार सेनिटाईजर, स्प्रे स्यानिटाइजर, फेसिसल्ड सेट, मास्क र ह्यान्ड ग्लोव लगायतका स्वास्थ्य सामग्री हस्तान्तरण गरिएको छ । ‘जनताहरु आउने र जनता भएको ठाउँमा पुग्ने स्वास्थ्यकर्मीहरुको सुरक्षा पनि हाम्रै दायित्व हो,’ नेता गुरुङले भने–‘स्वास्थ्य चौकीमा कार्यरत स्वास्थ्यकर्मीहरुको मनोबल उच्च बनाउने काममा पनि सबैले ध्यान दिन जरुरी छ ।’

स्वास्थ्य सामाग्री वितरण कार्यक्रममा नेपाली कांग्रेस कास्कीका नेता हरिप्रसाद लामिछाने, नेपाल तरुण दल कास्कीका अध्यक्ष मनोज गुरुङ, वडा नं २३ र १८ का वडा अध्यक्षद्वय विष्णुप्रसाद पराजुली र रणबहादुर थापा, वडा नं २३ का वडा सदस्य भरतराज भण्डारी, नेपाली कांग्रेसका पूर्वसहसचिव भरत बहादुर अधिकारी, आदिवासी जनजाति संघ कास्कीका अध्यक्ष एवं नेपाली कांग्रेस जिल्ला सदस्य आश बहादुर गुरुङ, नेपाली कांग्रेस वडा नं १८ का ईकाइ सभापति शिव तिमिल्सिना, स्वास्थ्य चौकीका प्रमुखहरु लगायत नेविसंघका नेता पशुपति भट्टराई, विवेक पराजुली, सुजन पराजुली, महेश तिमिल्सिना र महादेव गिरीलगायतले कोरोना संक्रमणको समयमा राज्य सत्ताको छिनाझम्टीमा रुमल्लिएकोमा दुःख व्यक्त गरे ।