“यतिबेला तिनै सर्वसाधारण उचित उपचार नपाएर मर्दैछन् भने तिनै लासमा अवसर खोजेर त्यो समूह मुनाफा धन्दामा लाग्न रस्साकस्सी गर्दैछ ।”

पोखरा उपत्यकामा २५०० सय मान्छे र नेपालभरि २ लाख मान्छेले देशका समाचार, सामाजिक सञ्जाल, राजनीति, नियुक्ति, पद, निर्णय, प्राकृतिक संशाधन, सरकारी ढुकुटी सबै कब्जा गरेका छन् ।

यिनैको स्वार्थमा समाचार लेखिन्छन् । निर्णय गराईन्छन् । र, यिनैले देशको स्रोत साधन कब्जामा राख्छन् । बाँकी सर्वसाधारण त जीवन धान्नलाई दौडदा दौडदै प्राण त्याग गर्दछन् ।

यो देशको ३ करोड जनसंख्यामा यी दुई लाख नैं सबथोक हुन । लुटेरा, समाजसेवी, व्यापारी, राजनीतिज्ञ, पत्रकार, निर्णायक पदमा बसेका कर्मचारी बाँकी सर्वसाधारण त यिनका संशाधन मात्रै हुन् । यिनैका लागि प्रयोग हुने यिनैका लागि मारिने ।

यतिबेला तिनै सर्वसाधारण उचित उपचार नपाएर मर्दैछन् भने तिनै लासमा अवसर खोजेर त्यो समूह मुनाफा धन्दामा लाग्न रस्साकस्सी गर्दैछ ।

खासमा, संगठित रुपमा देशको व्यवस्थालाई नै कब्जामा लिएर राष्ट्रिय अर्थतन्त्र र साधनस्रोत कब्जामा लिने समूहबाट विश्व नै आक्रान्त छ । यस्तो समूहका प्रतिवद्ध व्यक्तिहरुको समूह ईटली राज्यको सिसिली भन्ने शहरबाट सुरु भएको हो ।

जसले विश्वभरी आफ्ना स्वार्थपूर्तिका लागि राज्य संरचना नैं कब्जा गर्थे । यो पछि विश्वका धेरै देशका चलाख तर अपराधिक मनोदशा भएका व्यक्तिहरुले सुरु गरे । यो समूह माफियाका नामले चिनिन्छ । व्यवस्था नै कब्जा गर्ने यो समूहबाट देशलाई बचाउने भनेको जनता सजक हुने उपाय मात्रै हो ।