पोखरा । राष्ट्रिय जनमोर्चाले एमालेलाई साथ नदिने निर्णय गरेसँगै अब गण्डकी प्रदेश सरकार ढल्ने निश्चित भएको छ । सरकारविरुद्ध प्रतिपक्षले ल्याउने अविस्वासको प्रस्तावमा समर्थन गर्ने निर्णय गर्दै जनमोर्चाले एमालेलाई दिएको समर्थनबाट पछि हट्ने निर्णय गरेको हो ।

जनमोर्चाका अध्यक्ष चित्रबहादुर केसीले एक प्रेस वक्तव्य जारी गर्दै गण्डकी प्रदेश सरकारलाई दिएको समर्थन फिर्ता लिएका हुन् । प्रतिगमनलाई नै मद्दत पुग्ने गरी गण्डकी प्रदेश सरकारले काम गरिरहेको आरोप अध्यक्ष केसीले लगाएका छन् ।

प्रधानमन्त्री खड्गप्रसाद ओलीका अन्धभक्त भनेर चिनिने मुख्यमन्त्री पृथ्वीसुब्बा गुरुङलाई ओलीका पक्षमा प्रतिगमनलाई मद्दत पुग्ने गरी काम गरिरहेकोले मुख्यमन्त्रीलाई नै हटाउने प्रस्तावमा समर्थन गर्ने निर्णय गरेको वक्तत्वमा उल्लेख छ ।

‘गण्डकी प्रदेश सरकारले ओलीको पक्षमा काम गरिरहेको छ । त्यसका क्रियाकलापहरुले पनि प्रतिगमनलाई मद्दत पुग्छ’, अध्यक्ष केसीले वक्तव्यमा भनेका छन्–‘त्यसकारण गण्डकी प्रदेश सरकारका विरुद्ध प्रतिपक्षबाट आउने अविश्वासको प्रस्तावलाई हाम्रो समर्थन हुनेछ ।’

आफूहरु वामपन्थीको पक्षमा रहेकोले हालसम्म सरकारको समर्थन गरिरहेको तर नेकपा माओवादीले समर्थन फिर्ता लिइसकेपछि एमाले एक्लैको सरकार भएकोले समर्थन गर्न नसकिने जनमोर्चाको तर्क रहेको छ । साथै, मुख्यमन्त्रीबाट पृथ्वी सुब्बा हटेपछि नयाँ बन्ने सरकारलाई समर्थन गर्ने तर सहभागी नहुने समेत जनमोर्चाले स्पष्ट जनाएको छ।