काठमाडौं । सत्तारुढ नेकपाको पुष्पकमल दाहाल र माधव नेपाल समूहको केन्द्रीय कमिटी बैठकले माधवकुमार नेपाललाई नयाँ अध्यक्षको रुपमा चयन गरेको छ । अध्यक्ष खड्गप्रसाद ओलीलाई अनुशासनको कारवाही गर्दै बैठकले अध्यक्षको जिम्मेवारीबाट मुक्त गर्ने निर्णय पनि गरेको छ ।

आज बबरमहलस्थित कार्की ब्याङक्वेटमा बसेको बैठकमा वरिष्ठ नेता झलनाथ खनालको प्रस्तावमा नेता नेपाललाई अध्यक्ष चयन गरिएको थियो । सो बैठकले नेता कृष्णबहादुर महरालाई स्थायी कमिटी सदस्य बनाउने प्रस्ताव पनि पारित गरेको छ ।

सो बैठकमा केन्द्रीय सदस्य प्रभु शाहले दुईजना अध्यक्ष बनाउने प्रस्तावको विरोध गर्नुभएको थियो । पुनः दुई अध्यक्ष नाटक जस्तै भएको भन्दै जनतामा आशाको सञ्चार गराउन पनि एउटै अध्यक्षको नेतृत्वमा अघि बढ्नु पर्ने उहाँको भनाई थियो ।

संसद विघटनको सिफारिस गरेर अध्यक्ष केपी शर्मा ओलीले ऐतिहासिक राजनीतिक परिवर्तन, संविधान, लोकतन्त्र, पार्टी एकताको विरुद्धको काम गरेको भन्दै अनुशासनको गम्भीर उल्लंघन भएको हुँदा पार्टीको अन्तरिम विधान अनुसार कारबाही गर्दै पार्टी अध्यक्षको जिम्मेवारीबाट मुक्त गर्ने निर्णय गरेको थियो ।

अध्यक्ष ओलीलाई अनुशासनको कारवाही गरेपछि रिक्त हुन पुगेको एक जना अध्यक्ष पदमा नेता माधवकुमार नेपाललाई चयन गर्ने निर्णय गरिएको जानकारी प्रवक्ता नारायणकाजी श्रेष्ठले दिनुभयो ।

बैठकमा अध्यक्ष पुष्पकमल दाहाल ‘प्रचण्ड’ले ओलीको एकाधिकारवादी सोंच र व्यवहारका कारण आलोपालोको मान्यता पुरा हुन नसकेको भन्दै आफूहरु मिलेर अघि बढ्ने ऐक्यवद्धता प्रकट गर्नुभयो । अर्को बैठक बिहीबार साढे ११ बजे बस्ने गरी आजको बैठक टुंगिएको छ ।