पोखरा । नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीको केन्द्रीय जनपरिषद् नेपालले उखु किसानहरुलाई शोषण गर्ने ठगहरुलाई कारवाही गर्ने चेतावनी दिएको छ ।

केन्द्रीय जनपरिषद् नेपालका प्रमुख सन्तोष बुढामगरले एक प्रेस विज्ञप्ति जारी गर्दै उखु किसानहरुको समस्या र आन्दोलनबारे जनसत्ताका तर्फबाट गम्भिर र सुक्ष्म अध्ययन भईरहेको उल्लेख छ ।

चिनी उद्योगका मालिकहरुबाट लामो समय शोषण र उत्पीडन झैल्दै आईराखेका र सरकारबाट समेत ठगिएर आफ्नो पसिनाको मूल्य पाउन पटक–पटक सडकमा उत्रिन बाध्य भएका उखु किसानको समस्या र आन्दोलनबारे जसत्ताका तर्फबाट गम्भीर र सुक्ष्म अध्ययन भईरहेको विज्ञप्तिमा उल्लेख छ ।

सरकार नै साक्षी सबेर भएको सहमति कार्यान्वयन गराउन आन्दोलन गर्नुपर्ने अवस्था आउनु यो राज्यव्यवस्थाको चरम लापरवाही, गैरजिम्मेवारी, निकम्मापन र असफलता भएको विज्ञप्तिमा उल्लेख छ । केन्द्रीय जनपरिषद्ले उखु किसानहरुको आन्दोलनप्रति पूर्ण साथ र ऐक्यवद्धता प्रकट गरेको छ ।

श्रमिक किसानहरुको पसिनाबाट केही दलालहरुको दिनप्रतिदिन महल ठडिदैं जाने र जीवनभर मेहनतरत किसानहरुको भएको घर र खेत समेत लिलाम भई बेघरबार र विचल्ली बन्नुपर्ने परिपाटी र यस्तो राज्यव्यवस्थाको अन्त्यका लागि एकीकृत जनक्रान्तिमार्फत् संघर्षमा लडिरहेको विज्ञप्तिमा उल्लेख छ ।

केन्द्रीय जनपरिषद् नेपालका प्रमुख बुढामगरले सम्पूर्ण उत्पीडित उखु किसानहरुले पाउनु पर्ने रकम क्षतिपूर्तिसहित तुरुन्तै भुक्तान गर्न जोडदार माग गर्नुभएको छ । उत्पीडित किसानहरुका तर्फबाट किसानमारा शोषक र ठगहरुलाई जनसत्ताले कारवाही गर्ने चेतावनी प्रमुख बुढामगरले विज्ञप्तिमार्फत् दिनुभएको छ ।