News Portal

ताजा शिर्षकहरु

चर्चित शिर्षकहरु

क्राईम–न्यूज प्रमुख समाचार

सराङकोट बालसुधार गृहबाट फरार बालबन्दी १८ घण्टामैं पक्राउ

कास्कीमा १४४ र सराङकोट बालसुधार गृहमा ८ अझै सम्पर्कविहीन

पोखरा, ३० कार्तिक । पोखरा-१८, सराङकोटस्थित बालसुधार गृहको पर्खाल नाघेर भागेका १८ वर्षीय थापा थरका बालबन्दी १८ घण्टामै पक्राउ परेका छन् । जिल्ला प्रहरी कार्यालय कास्कीका एसपी नवीन कार्कीका अनुसार उनलाई राति १ बजे पोखरा लेकसाइडस्थित स्ट्रिट नम्बर १९ मा हम्मरसहित चोरी गर्ने तयारी गरिरहेका बेला पक्राउ गरिएको हो ।

करिब सय जना प्रहरी र तालिमप्राप्त कुकुरसहितको टोली परिचालन गरी उनलाई नियन्त्रणमा लिइएको प्रहरीले जनाएको छ । चोरीका दुईवटा मुद्दा खेपिरहेका पाँचथरका यी बालबन्दी यसअघि पनि २०८२ पुस २४ मा अस्पतालबाट फरार भई २०८३ जेठ ४ गते इटहरीबाट पक्राउ परेका थिए । पटक-पटक फरार हुने उनलाई अब कारागार ऐनअन्तर्गत मुद्दा चलाउने तयारी गरिएको छ ।

प्रहरीका अनुसार बालसुधार गृहमा क्षमताभन्दा दोब्बर बन्दी राखिनु, उमेर पुगेका र साना बालबन्दी एकैठाउँमा रहनु तथा सुरक्षाकर्मीलाई हतियार र पोसाकको अनुमति नहुनुले सुरक्षा चुनौती बढेको छ ।

देशभर अझै झण्डै २९ सय कैदीबन्दी फरार:
२०८२ भदौ २३/२४ गतेको जेनजी आन्दोलनको उग्रतामा देशभरका कारागार र बालसुधार गृहहरूमा तोडफोड र आक्रमण भएपछि करिब १४ हजार ५ सय ४९ कैदीबन्दी र बालबन्दी फरार भएका थिए। एक वर्षभन्दा बढी समय बितिसक्दा पनि कारागार व्यवस्थापन विभागको पछिल्लो तथ्यांक (कात्तिक २४, २०८३) अनुसार अझै २ हजार ८ सय ९६ जना फरार छन्। यसमध्ये २ हजार ६ सय ७६ जना नेपाली र २ सय २० जना विदेशी नागरिक छन्।

कास्की कारागारबाट मात्रै भागेकामध्ये १ सय ४४ जना अझै फरार छन्। सराङकोटस्थित बालसुधार गृहबाट आन्दोलनका क्रममा भागेका १०९ जना बालबन्दीमध्ये ८ जना अझै सम्पर्कमा आएका छैनन्। यी फरारहरूमध्ये धेरै जबरजस्ती करणी (बलात्कार), लागुऔषध, कर्तव्य ज्यान, डाँकाचोरी, चोरी लगायत गम्भीर अपराधमा सजाय काटिरहेका थिए। विभागका अनुसार जबरजस्ती करणीका मात्रै १ हजार ३२, लागुऔषधका ९ सय ३७ र कर्तव्य ज्यानका ४ सय ९३ जना अझै बाहिर छन्।

समाजमा बढ्दो डर र त्रास
हजारौं गम्भीर अपराधी सडकमा हुँदा समाजमा गहिरो असुरक्षाको महसुस भइरहेको छ। बलात्कार, हत्या, लागुऔषध र डाँकाका दोषीहरू फरार रहँदा महिला, बालबालिका र सामान्य नागरिकहरू रातमा बाहिर निस्कन डराउने अवस्था सिर्जना भएको छ। चाडपर्वका बेला यो डर अझ बढ्ने गरेको स्थानीयहरू बताउँछन्। फरार कैदीहरू पुनः अपराधमा संलग्न भएको घटनाहरू प्रहरीले पक्राउ गर्दा देखिएका छन्। यसले कानुनको शासनमाथि प्रश्न उठाएको छ र राज्यको सुरक्षा संयन्त्र कमजोर रहेको सन्देश दिएको छ।

प्रहरीले दैनिक खोजी जारी राखेको छ। जिल्लास्तरमा सहायक प्रमुख जिल्ला अधिकारीको संयोजकत्वमा टोली गठन गरिएको छ र सीआरएस (अपराध अभिलेख प्रणाली) प्रयोग गरी निगरानी गरिरहेको छ। तर विदेशी कैदीहरू प्रायः सीमा पार गरेर गएकाले पक्राउ गर्न कठिन भएको प्रहरीको भनाइ छ।

यो अवस्था केवल तथ्यांकको कुरा होइन-यो समाजको सुरक्षा, महिला-बालबालिकाको सुरक्षा र राज्यको विश्वसनीयतासँग जोडिएको गम्भीर मुद्दा हो। फरार कैदीहरूलाई चाँडोभन्दा चाँडो पक्राउ गरी कारागार फर्काउनु र कारागार तथा सुधार गृहको सुरक्षा व्यवस्था सुदृढ बनाउनु अहिलेको आवश्यकता हो।

डनन्यूज ट्रेन्डिङ