काठमाडौं, ५ भदौं । सरकारले आधारभूत स्वास्थ्य सेवाअन्तर्गत स्थानीय तहका स्वास्थ्य संस्थाबाट वितरण हुने निःशुल्क औषधि तथा औषधिजन्य सामग्रीको अभाव हुन नदिन कूटनीतिक तथा प्रशासनिक कदम चालको छ। स्वास्थ्य मन्त्रालयले मातहतका स्वास्थ्य संस्थामा निःशुल्क औषधिको उपलब्धता र प्रभावकारी वितरण सुनिश्चित गर्न सबै स्थानीय तहलाई आधिकारिक परिपत्र जारी गरेको छ।

संघीय मामिला तथा सामान्य प्रशासन मन्त्रालयमार्फत पठाइएको यस परिपत्रमा स्थानीय तहहरूलाई आधारभूत स्वास्थ्य सेवा सञ्चालनका लागि आवश्यक पर्ने औषधि तथा मेडिकल सामग्रीको विस्तृत सूची समेत उपलब्ध गराइएको छ। मन्त्रालयले तोकिएको सूचीअनुसार सम्बन्धित स्थानीय तहले आफ्नो जिम्मेवारी बहन गर्दै वर्षभरि नै स्वास्थ्य संस्थामा औषधिको नियमित आपूर्ति कायम राख्न निर्देशन दिएको छ।

परिपत्रमा स्थानीय तहहरूलाई आफ्ना मातहत रहेका अस्पताल, स्वास्थ्य चौकी तथा बर्थिङ सेन्टरहरूमा औषधिको सहि भण्डारण, व्यवस्थापन र बिरामीलाई निर्धारित औषधि निःशुल्क वितरण गर्ने प्रक्रियालाई थप व्यवस्थित बनाउन आग्रह गरिएको छ। यस कदमले आधारभूत स्वास्थ्य सेवाको पहुँचबाट टाढा रहेका नागरिकलाई स्थानीय स्तरमै सहज रूपमा निःशुल्क औषधी उपलब्ध हुने विश्वास लिइएको छ।