बुटवल, ९ असार । नेकपा एमालेका उपाध्यक्ष विष्णु पौडेलको लगानी रहेको भनिएको बुटवलको एक कृषि फार्ममा सम्पत्ति शुद्धीकरण अनुसन्धान विभागले मंगलबार छापा हानेको छ।

विभागले एक स्थानीय व्यवसायीको नाममा ३५ बिघा जग्गा खरिद गरी लुकाइएको सूचनाको आधारमा उक्त फार्ममा छापा मारेको हो। छापाका क्रममा विभागले केही महत्वपूर्ण विवरण तथा प्रमाण संकलन गरेको छ।

विभागका अनुसार, पौडेलले बिचौलिया समूहलाई नीतिगत रूपमा सहयोग गरी आर्थिक लाभ लिएको र त्यसलाई सम्पत्ति शुद्धीकरण गरेको देखिएको छ। सोही अभियोगमा विभागले पौडेललाई सोमबार नियन्त्रणमा लिएको थियो।

भैंसेपाटीस्थित उनको निजी निवासमा पनि सोमबार छापा हानिएको थियो। छापाका क्रममा ल्यापटप, पेनड्राइभ र चेकबुक लगायतका सामग्री बरामद गरिएको विभाग स्रोतले जनाएको छ।

बिचौलिया दीपक भट्टसहित अन्य व्यापारीहरूलाई सहयोग गरेर पौडेलले करोडौं रुपैयाँको आर्थिक लाभ लिएको आरोप छ। यस सम्बन्धमा विभागले थप अनुसन्धान अघि बढाएको छ। विशेष अदालतले पौडेललाई सात दिनको थुनामा राखेर अनुसन्धान गर्न म्याद दिएको छ।