पोखरा, १ असार । पोखरामा दोस्रो हिमालयन रिम फिल्म प्रदर्शनीको नेपाल चरण सफलतापूर्वक सम्पन्न भएको छ। चलचित्रलाई सांस्कृतिक सेतुको रूपमा उपयोग गर्दै यस प्रदर्शनीले चीन र नेपालबीच उच्चस्तरीय शैक्षिक संवाद तथा फिल्म प्रदर्शनमार्फत जनस्तरको आदानप्रदानलाई सशक्त बनाएको छ।

यसले स्थानीय विद्यार्थी र चलचित्रकर्मीहरूलाई चिनियाँ वुशिया (मार्शल आर्ट) चलचित्रको समकालीन आकर्षण र डिजिटल क्षमतासँग परिचित गराएको छ भने चिनियाँ तथा नेपाली चलचित्रकर्मीहरूबीच कलात्मक अनुभवको साझेदारीका लागि पनि महत्वपूर्ण मञ्च प्रदान गरेको छ।

प्रदर्शनीको पहिलो गन्तव्य त्रिभुवन विश्वविद्यालय थियो। त्यहाँ द लिजेन्ड्स अफ द कन्डोर हिरोजः द ग्यालेन्ट्स र ब्लेड्स अफ द गार्डियनः विन्ड राइजेस इन द डेजर्ट जस्ता चलचित्र प्रदर्शन गरिए। उपस्थित प्राध्यापक तथा विद्यार्थीहरूले चिनियाँ वुशिया चलचित्रमा वीरताको भावनालाई समकालीन रूपमा प्रस्तुत गरिएको शैलीले नेपाली कलामा पाइने प्रकृति र मानवबीचको आध्यात्मिक समन्वयसँग गहिरो समानता रहेको बताए।

बेइजिङ नर्मल विश्वविद्यालयका प्राध्यापक झाङ यानले ‘चिनियाँ वुशिया सिनेमाः शताब्दीदेखि विश्वसम्म’ शीर्षकमा मुख्य व्याख्यान दिए। उनले वुशिया संस्कृतिको विश्वव्यापी प्रसार र आधुनिक सन्तुलनका बारेमा चर्चा गरे।

त्यसपछि कार्यक्रम पोखरा विश्वविद्यालयमा सारिएको थियो। हिमालयन रिम फिल्म प्रदर्शनीकी संस्थापक हुआङ जुनयानले उद्घाटन मन्तव्य राखिन्। जुन १३ को बिहान आयोजित विशेष गोष्ठीको अध्यक्षता एरिजोना स्टेट विश्वविद्यालयका सह–प्राध्यापक मा रुइछिङले गरेका थिए।

उनले चीनको एक अग्रणी एआई कम्पनीका जेनेरेटिभ एआई मार्केटिङ विशेषज्ञ रायनसँग ‘वुशिया सिनेमादेखि एआई बजारसम्म’ शीर्षकमा गहन संवाद सञ्चालन गरे। सो क्रममा कृत्रिम बुद्धिमत्ताले चलचित्र निर्माण, उत्पादन प्रक्रिया र बजार संरचनालाई कसरी पुनःपरिभाषित गरिरहेको छ भन्ने विषयमा औद्योगिक तथा प्राविधिक दुवै दृष्टिकोणबाट छलफल भयो।

प्राध्यापक मा रुइछिङले नै ‘सीमारहित वीरताः चिनियाँ वुशिया सिनेमा र विश्वव्यापी दर्शक’ शीर्षकमा व्याख्यान दिए। उनले वीरताको भावना विभिन्न संस्कृतिमा कसरी यात्रा गर्दै विश्वभरका दर्शकहरूमा निरन्तर लोकप्रिय रहँदै आएको छ भन्ने विषयको व्यवस्थित विश्लेषण प्रस्तुत गरे।

चलचित्र प्रदर्शन खण्डमा द मास्टर ले यथार्थपरक कुंगफु सौन्दर्यशास्त्र र जियाङहु (मार्शल संसार) का मूल्यहरूप्रतिको दृढ प्रतिबद्धता प्रस्तुत गर्‍यो भने आई एम ह्वाट आई एम २ ले डिजिटल दृश्य प्रभावमार्फत साधारण युवाहरूको सपना पूरा गर्ने अदम्य प्रयासलाई चित्रण ग¥यो। यी दुवै फिल्मले चिनियाँ सिनेमामा वीरता र जीवनदर्शनको व्यापक चित्र प्रस्तुत गरे।

प्रदर्शनपछि द मास्टर का निर्देशक शु हाओफेङले प्रत्यक्ष अनलाइन संवादमार्फत चिनियाँ मार्शल सौन्दर्यशास्त्रबारे गहन छलफल गरे। त्यस्तै आई एम ह्वाट आई एम २ का सहनिर्माता ली यिलिनले सिर्जनात्मक प्रक्रिया र एनिमेटेड चलचित्रको अन्तर्राष्ट्रिय अभिव्यक्तिबारे आफ्ना अनुभव साझा गरे।

शैक्षिक कार्यक्रम र फिल्म प्रदर्शनबाहेक, दिनभर सञ्चालन भएको वुशिया फेयर तथा बु यी झेन जोङ हस्तकला कार्यशालामा सहभागीहरूले स्थानीय वस्त्रकला विशेषज्ञहरूको मार्गदर्शनमा साना हात्तीका आकृतिहरू तयार पारे। सांस्कृतिक समिश्रणको प्रतीकका रूपमा रहेका यी गतिविधिले विद्यार्थीहरूलाई आफ्नै हातले दैनिक जीवनको सौन्दर्य अनुभव गर्ने अवसर दिए।

यसैबीच, एआईजीसी (कृत्रिम बुद्धिमत्ता आधारित सामग्री सिर्जना) प्रविधिबाट तयार पारिएको प्रदर्शनीको मुख्य गीत ‘द एन्डलेस राइड’ सार्वजनिक गरियो। यस गीतले हिमालय क्षेत्रका युवाहरूबीच सभ्यतागत आदानप्रदान र संवादलाई समकालीन सांगीतिक अभिव्यक्ति प्रदान गरेको छ।

यो प्रदर्शनी नेपालका परराष्ट्रमन्त्रीको चीन भ्रमणसँग संयोग परेको थियो। यसले दुई देशबीच उच्चस्तरीय सम्बन्ध अझ सुदृढ हुँदै गएको संकेत गर्दै जनस्तरको आदानप्रदानलाई नयाँ ऊर्जा दिएको छ।

सभ्यता र हृदयलाई जोड्ने महत्वपूर्ण सांस्कृतिक मञ्चको रूपमा रहेको यस प्रदर्शनीले प्रकाश र चलचित्रलाई माध्यम तथा वुशिया संस्कृतिलाई पुलको रूपमा प्रयोग गर्दै हिमालय क्षेत्रका देशहरूबीच सांस्कृतिक अन्तरक्रियाका लागि जीवन्त तथा दीर्घकालीन मार्ग निर्माण गरेको छ। यो केवल सीमापार फिल्म महोत्सव मात्र नभई चीन र नेपालका युवाहरूले साझा समझदारी निर्माण गर्दै सिर्जनात्मकता र भविष्यका सम्भावनाहरूलाई सँगै कल्पना गर्ने जीवन्त अभ्यास बनेको छ। यसले सभ्यताबीचको संवाद र पारस्परिक सिकाइको नयाँ अध्याय लेखेको छ।

दोस्रो हिमालयन रिम फिल्म प्रदर्शनीको एक महत्वपूर्ण केन्द्रको रूपमा यो कार्यक्रमले चलचित्र प्रदर्शन र सांस्कृतिक आदानप्रदानमार्फत चिनियाँ वुशिया सिनेमाको वीरता तथा पूर्वीय दर्शनलाई सीमापार भावनात्मक सम्बन्धमा रूपान्तरण गरेको छ। कार्यक्रम अवधिभर एसियाली कथावस्तु, परम्परागत संस्कृति र डिजिटल दृश्य कलाबारे भएका छलफलहरूले चिनियाँ र नेपाली चलचित्रकर्मीहरूबीच संवादको दायरा अझ फराकिलो बनाएको छ। यसको सफल आयोजनाले विश्वविद्यालयस्तरीय सांस्कृतिक आदानप्रदानलाई समृद्ध बनाउनुका साथै भविष्यमा एसियाली चलचित्र संस्कृतिको सहकार्यका लागि पनि अर्थपूर्ण योगदान पुर्‍याएको छ।