पोखरा, १० जेठ । पोखराको फूलबारीस्थित नेपाल मणिपाल शिक्षण अस्पताल प्रशासन र यसका सञ्चालकहरूको चरम दादागिरी एवं विद्यार्थी शोषणविरुद्ध अखिल नेपाल विद्यार्थी युनियन (समाजवादी) गण्डकी प्रदेश कमिटीले कडा चेतावनी दिएको छ।

चिकित्सा शिक्षा (बीएस्सी नर्सिङ) अध्ययनरत छात्राहरूमाथि अस्पताल प्रशासन र मेडिकल माफियाका रूपमा प्रस्तुत भएका सञ्चालकद्वय आनन्दराज बतास र नारायण पौडेलबाट भइरहेको ’दासयुगीन शोषण’ र अमानवीय व्यवहारप्रति संगठनले गम्भीर ध्यानाकर्षण गराउँदै सशक्त आन्दोलनको घोषणा गरेको हो।

बिहीबार (जेठ ८ गते) एक प्रेस विज्ञप्ति जारी गर्दै संगठनले मनिपाल प्रशासनको अटेरीपन र सञ्चालकहरूको गैरजिम्मेवार अभिव्यक्तिको कडा शब्दमा भर्त्सना गरेको छ।

विज्ञप्ति अनुसार, लाखौँ रुपैयाँ चर्को शुल्क बुझाएर सुन्दर भविष्यको खोजीमा आएका छात्राहरूलाई मणिपाल प्रशासनले पशुवत् व्यवहार गरेको छ। मात्र २ जना अट्ने साँघुरो, अँध्यारो, र भेन्टिलेसन समेत नभएको कुरुप कोठामा ८ जनासम्म छात्राहरूलाई ’भेडा–बाख्रा जस्तै’ कोचेर राखिएको सनसनीपूर्ण खुलासा भएको छ।

गुम्स्याहट र निसास्सिएका कारण छात्राहरू रातभर छतमा उभिएर रात काट्न बाध्य भइरहेको दारुण चित्र विज्ञप्तिमा कोरिएको छ। यति मात्र नभई, अस्पतालको भुइँतल्ला (बेसमेन्ट)मा रहेको अक्सिजन र प्राकृतिक प्रकाशविहीन कोठामा दैनिक ६ देखि ७ घण्टासम्म विद्यार्थीलाई कोचेर उनीहरूको स्वास्थ्यमाथि गम्भीर खेलबाड भइरहेको दाबी गरिएको छ।

यस चरम अन्याय र अत्याचारका विरुद्ध आवाज उठाउँदा मणिपाल कलेजका प्रिन्सिपल र प्रशासनले उल्टै छात्राहरूलाई धम्की दिने, मानसिक त्रास फैलाउने र आवाज दबाउने हर्कत गरिरहेको संगठनले जनाएको छ। विद्यार्थी संगठनले यसलाई कलेजको सामान्य लापरबाही मात्र नभई अन्तर्राष्ट्रिय मानव अधिकार र विद्यार्थी हक–अधिकारको ठाडो र क्रुर उल्लंघन, एवं ‘निन्दनीय र आपराधिक कार्य’ ठहर गरेको छ।

यस्तो संवेदनशील र दर्दनाक अवस्था बाहिर आउँदा समेत माफी माग्नुको सट्टा अस्पतालका सञ्चालक नारायण पौडेलले सञ्चारमाध्यममा ‘तिरेको शुल्क अनुसारकै बसाइ हो, थप सुविधा चाहिए थप पैसा तिर्नु’ भनी दिएको हदसम्मको गैरजिम्मेवार, अहङ्कारी र शोषकमुखी अभिव्यक्तिको संगठनले घोर आपत्ति प्रकट गरेको छ।

विवादै विवादको बिचमा नेपाल मणिपाल शिक्षण अस्पतालका सञ्चालकद्वय आनन्दराज बतास र नारायण पौडेल । तस्विर एआई

शिक्षा र स्वास्थ्य क्षेत्रलाई केवल पैसा छाप्ने मेसिन र विद्यार्थीलाई वस्तु ठान्ने वित्तीय माफिया सञ्चालकद्वय आनन्दराज बतास र नारायण पौडेललाई लक्षित गर्दै अखिल (समाजवादी) ले २४ घण्टाको कडा अल्टिमेटम दिएको छ। २४ घण्टाभित्र छात्राहरूको आवास र पढाइको अवस्था मर्यादित बनाई सम्झौता अनुसार सुधार नगरिए संगठन कडा भन्दा कडा र निर्णायक सङ्घर्षको आँधीबेहरी सिर्जना गर्न बाध्य हुने चेतावनी इन्चार्ज एवं केन्द्रीय सचिव प्रकाश सीद्वारा हस्ताक्षरित विज्ञप्तिमा उल्लेख छ।

संगठनले कास्कीका प्रमुख जिल्ला अधिकारी (प्रजिअ) र सम्बन्धित सरकारी नियामक निकायहरूलाई यस गम्भीर विषयमा तत्कालै स्थलगत अनुगमन गरी ठोस कदम चाल्न र पीडित विद्यार्थीहरूको समस्या समाधानका लागि निर्णायक पहलकदमी लिन जोडदार माग गरेको छ।

अन्तिम चेतावनी दिँदै विज्ञप्तिमा भनिएको छ-‘यदि राज्यका लाचार निकायहरूले समयमै पीडित विद्यार्थीहरूको पक्षमा एक्सन लिएनन् र यी माफिया सञ्चालकहरूलाई नै संरक्षण गरिरहे भने, अखिल (समाजवादी) टुलुटुलु हेरेर बस्ने छैन। संगठन आफैँ मैदानमा उत्रिएर अस्पताल सञ्चालकहरू आनन्दराज बतास र नारायण पौडेल लगायतका मतियारहरूलाई जनताको बिचमा नाङ्गै पार्दै आवश्यक कडा कारबाही गर्न बाध्य हुनेछ।’

यस आन्दोलन र प्रतिरोधबाट निस्कने जुनसुकै भयानक र अप्रिय परिणामको सम्पूर्ण जिम्मेवार कलेज प्रशासन, शोषक सञ्चालकद्वय आनन्दराज बतास र नारायण पौडेल एवं लाचार राज्य संयन्त्र आफैँ हुनुपर्ने कडा चेतावनी समेत दिइएको छ।