पोखरा, २९ चैत । डेभिजफल क्लबको अध्यक्षमा दीपक सुवेदी सर्वसम्मत चयन भएका छन् । गुप्तेश्वर महादेव गुफा नजिकै रहेको डेभिजफल क्लब, पोखरा–१७ छोरेपाटनले आफ्नो १४औं साधारणसभा तथा ११औं अधिवेशनबाट आगामी दुई वर्ष लागि सुबेदीको अध्यक्षमा नयाँ कार्यसमिति सर्वसम्मत रूपमा चयन गरेको हो ।

कार्यक्रममा पोखरा वडा नं. १७ की वडाध्यक्ष राधिकाकुमारी शाही योगीले युवाहरूलाई सृजनशील कामसँग जोडेर मर्यादित रोजगारी सिर्जना गर्न स्थानीय सरकारले विशेष प्राथमिकता दिएको बताईन् । उनले युवाहरूले घर–घरमा पुगेर नागरिकका आवश्यकता बुझ्दै योजनाबद्ध र दिगो विकासका कार्यक्रम अघि बढाउनुपर्नेमा जोड दिईन् ।

जनताको कर जनताकै हितमा पारदर्शी ढंगले खर्च गर्नु सबैको साझा दायित्व रहेको उल्लेख गर्दै वडाध्यक्ष शाहीले युवा, महिला र पछाडि पारिएका वर्गको सशक्तीकरणमा आफू केन्द्रित रहने प्रतिबद्धता व्यक्त गरिन् ।
क्लबका सल्लाहकार झपिन्द्रराज रेग्मीले क्लबले सामाजिक उत्तरदायित्वअन्तर्गत चेतनामूलक कार्यक्रम, छात्रवृत्ति अक्षय कोष, खेलकुद, रक्तदान, सरसफाइ र वृक्षारोपणजस्ता काममा निरन्तर सक्रिय भूमिका निर्वाह गर्दै आएको बताए ।

क्लबका पूर्वअध्यक्ष विनम गुरुङले वि.सं. २०५५ मा स्थापना भएको डेभिजफल क्लबले सामाजिक क्षेत्रमा निरन्तर योगदान दिँदै जनताको विश्वास जित्न सफल भएको धारणा व्यक्त गरे ।

नवनिर्वाचित अध्यक्ष सुबेदीले ‘सामाजिक सेवा र युवा सामर्थ्य’लाई मुख्य नारा बनाउँदै क्लबलाई थप सक्रिय र प्रभावकारी बनाउने प्रतिबद्धता व्यक्त गरे ।

उनले आगामी कार्यकालमा डिजिटल सूचना प्रणाली व्यवस्थापन, खेलकुद तथा नेतृत्व विकास कार्यक्रम, सरसफाइ अभियान, वृक्षारोपण, सूचना प्रवाह सुदृढीकरण, पर्यटन प्रवर्धन, पार्क निर्माण, पार्किङ व्यवस्थापन र फ्री वाइफाइ विस्तारलाई प्राथमिकतामा राखेर काम गर्ने योजना पनि सार्वजनिक गरे ।