काठमाडौं, चैत २५ । पूर्वप्रधानमन्त्री तथा नेपाली कांग्रेसका निवर्तमान सभापति शेरबहादुर देउवा र उनकी पत्नी पूर्वपरराष्ट्रमन्त्री डा. आरजु राणा देउवाविरुद्ध सम्पत्ति शुद्धीकरणसम्बन्धी अभियोगमा पक्राउ पुर्जी जारी भएको छ ।

सम्पत्ति शुद्धीकरण अनुसन्धान विभागले अनुसन्धानका लागि देउवा दम्पतीलाई पक्राउ गर्न जिल्ला अदालत काठमाडौंबाट मंगलबार अनुमति प्राप्त गरेको हो । अदालतले विभागको अनुरोधअनुसार पक्राउ पुर्जी जारी गरेको गृह मन्त्रालय स्रोतले जनाएको छ ।

विभागले देउवा दम्पतीको गैरकानुनी सम्पत्ति आर्जनसम्बन्धी विवरण संकलन गर्दै आएको थियो । गत भदौ २४ गते बूढानीलकण्ठस्थित देउवाको निवासमा भएको आगजनीका क्रममा घरभित्र ठूलो मात्रामा पैसा जलेको अवस्थामा भेटिएको भिडिओ सार्वजनिक भएपछि यो विषयमा छानबिनको माग उठेको थियो । उक्त घटनामा देउवा दम्पती घाइते भएका थिए ।

देउवा दम्पती हाल स्वास्थ्य उपचारका लागि विदेशमा रहेको बताइएको छ । विभिन्न स्रोतका अनुसार उनीहरू सिंगापुर हुँदै हङकङ पुगेका छन् ।

पक्राउ प्रक्रिया कसरी अघि बढ्छ ?
पक्राउ पुर्जी जारी भएसँगै विभागले नेपाल प्रहरीको केन्द्रीय अनुसन्धान ब्यूरो (सीआईबी) को सहयोग माग्ने भएको छ । यसअघि पूर्वमन्त्री दीपक खड्का, व्यवसायी दीपक भट्ट र शंकर ग्रुपका अध्यक्ष शंकरलाल अग्रवाललाई पनि सीआईबीले नै पक्राउ गरेर विभागलाई बुझाएको थियो ।

देउवा दम्पती विदेशमा रहेका कारण प्रहरीले पहिले उनीहरूको खोजी गर्नेछ । यदि उनीहरू नेपाल फर्किएमा विमानस्थलबाट नै पक्राउ गर्न सकिनेछ । तर, उनीहरूले नेपाल नफर्किएमा विभागले पासपोर्ट रोक्का गर्नुका साथै इन्टरपोलमार्फत डिफ्युजन नोटिस जारी गर्ने प्रक्रिया अघि बढाउनेछ । अन्तिम चरणमा इन्टरपोलको ‘रेड नोटिस’ जारी गर्न सकिने कानुनी व्यवस्था छ ।

सम्पत्ति शुद्धीकरणको कसुरमा ९० दिनसम्म थुनामा राखेर अनुसन्धान गर्न मिल्ने कानुनी प्रावधान छ । विभागले हालसम्मका अन्य मुद्दामा पनि आरोपीहरूलाई पक्राउ गरेर नै अनुसन्धान थालेको देखिन्छ ।

शेरबहादुर देउवा गृहमन्त्री एक पटक र प्रधानमन्त्री पाँच पटक भइसकेका छन् भने आरजु राणा देउवा एक पटक परराष्ट्रमन्त्री भइसकेकी छन् । दुवै नेपाली कांग्रेस केन्द्रित राजनीतिमा लामो समयदेखि सक्रिय छन् ।

यो घटनाले मुलुक बाहिर रहेका उच्च राजनीतिक व्यक्तित्वहरूको सम्पत्ति छानबिनलाई थप तीव्रता दिएको छ । बालेन शाह नेतृत्वको सरकारले चैत १३ गते पूर्वप्रधानमन्त्री तथा विशिष्ट व्यक्तिहरूको सम्पत्ति छानबिन गर्ने निर्णय गरेको थियो । त्यसैअनुसार पहिलो चरणमा केही व्यक्तिहरू पक्राउ परिसकेका छन् ।