काठमाडौं, १८ चैत । नेकपा (एमाले)ले संसदीय दलको नेतामा रामबहादुर थापा ‘बादल’लाई निर्विरोध चयन गरेको छ । बुधबार बसेको संसदीय दलको बैठकले उनलाई निर्विरोध रूपमा दलको नेता बनाएको हो ।

यसअघि युवा सांसद सुहाङ नेम्वाङले पनि संसदीय दलको नेताका लागि दाबी गरेका थिए । तर, मनोनयन दर्ताको अन्तिम समयमा आवश्यक प्रस्तावक र समर्थक जुटाउन नसकेपछि उनको उम्मेदवारी दर्ता हुन सकेन । निर्विरोध निर्वाचित भएका बादललाई सुहाङले खादा ओढाएर बधाई ज्ञापन गरेका छन् ।

नेकपा (एमाले)ले पार्टी अध्यक्ष केपी शर्मा ओलीको अनुपस्थितिमा कार्यवाहक अध्यक्षको जिम्मेवारी उपाध्यक्ष बादललाई दिएको छ ।

अध्यक्ष ओली ज्यानसम्बन्धी मुद्दाको अनुसन्धानका क्रममा हिरासतमा रहेका कारण उनलाई हिरासतबाट मुक्त नभएसम्मका लागि कार्यवाहक अध्यक्ष बनाइएको हो । ओलीले बादललाई लेखेको पत्रमा ‘म हिरासतबाट मुक्त नहुँदासम्मका लागि कार्यवाहक अध्यक्षको जिम्मेवारी दिएको छु’ भन्ने उल्लेख छ ।

आजै बुधबार बसेको संसदीय दलको बैठकले बादललाई संसदीय दलको नेतामा समेत चयन गरेको थियो ।

संसदीय दलको नेता चयन भएपछि थापाले भने, ‘संसदमा अंकगणितको हिसाबले हामी कमजोर देखिन सक्छौं, तर जनमतको हिसाबले प्रतिपक्षीहरू निकै ठूलो शक्ति बनेका छन् ।’ यी दुवै निर्णय आजै च्यासलमा बसेको पदाधिकारी र संसदीय दलको संयुक्त बैठकबाट भएका हुन् ।