गोरखा, १ चैत । मनकामना मन्दिर दर्शन गरेर फर्कंदै गरेको विद्युतीय (ईभी) माइक्रो बस दुर्घटनामा परेर ७ जनाको मृत्यु भएको छ। मृत्यु हुने सबै भारतीय नागरिक रहेका छन्।

शनिबार साँझ गोरखाको शहीदलखन गाउँपालिका–३, कनटार क्षेत्रमा यो दुर्घटना भएको हो। मनकामनाबाट मजुवा तर्फ आउँदै गरेको बागमती प्रदेश ००६ ख ८४३० नम्बरको माइक्रो बस सडकबाट करिब २०० मिटर तल खसेको थियो। उक्त बसमा १४ जना सवार थिए।

प्रहरीका अनुसार घटनास्थलमै ७ जनाको मृत्यु भएको छ भने बाँकी ७ जना घाइते भएका छन्। घाइतेहरूलाई उद्धार गरी नजिकैको अस्पतालमा उपचारका लागि पठाइएको छ। चालक र सहचालकबाहेक सबै यात्रु भारतीय नागरिक थिए, जसले मनकामना मन्दिर दर्शन गरेर फर्किंदै थिए।

प्रहरी, स्थानीयबासी र उद्धार टोलीको सहयोगमा घाइते र शव निकाल्ने काम गरिएको थियो। दुर्घटनाको कारणबारे भने अनुसन्धान भइरहेको छ। यो सडक खण्डमा यात्रु बोक्ने सवारी साधनहरूको चाप बढी हुने भएकाले सावधानी अपनाउन प्रहरीले आग्रह गरेको छ।