काठमाडौं, २८ फागुन । नेकपा (एमाले) का अध्यक्ष केपी शर्मा ओलीले हालैको निर्वाचनमा अपेक्षित नतिजा नआए पनि जनताको मतलाई पूर्ण सम्मान गर्ने प्रतिबद्धता व्यक्त गरेका छन् । सामाजिक सञ्जालमार्फत उनले मतदाताहरूप्रति कृतज्ञता प्रकट गर्दै पार्टी र आफ्नो जनसम्बन्धलाई थप मजबुत बनाउने बताएका छन् ।

झापा क्षेत्र नम्बर ५ बाट पराजित भएका ओलीको पार्टी एमालेले प्रतिनिधिसभा प्रत्यक्षतर्फ मात्र ९ सिट हात पारेको छ । ’यो निर्वाचनमा मेरो अपेक्षा अनुसारको परिणाम प्राप्त गर्न सकिनँ र हाम्रो पार्टीले पनि सोचेजस्तो सफलता हासिल गर्न सकेन,’ ओलीले लेखेका छन्, ’लोकतन्त्रमा जनताको अन्तिम निर्णय नै सर्वोच्च हुन्छ । म र मेरो पार्टी यस फैसलालाई हृदयदेखि स्वीकार गर्दछौं ।’

उनले एमालेलाई मत दिने सबैलाई धन्यवाद दिँदै भनेका छन्, ’तपाईंहरूको विश्वास नै हाम्रो मुख्य शक्ति हो । परिणाम हाम्रो पक्षमा नआए पनि जनसेवाप्रतिको हाम्रो प्रतिबद्धता कायमै छ । हामी सधैं जनतामाझ रहनेछौं, उनीहरूकै लागि काम गर्नेछौं र यो सम्बन्धलाई अझ दृढ बनाउँदै अघि बढ्नेछौं । मत, साथ र विश्वास प्रदान गर्ने सबैलाई हार्दिक धन्यवाद ।’