पोखरा, २२ फागुन । कास्की निर्वाचन क्षेत्र नम्बर ३ मा राष्ट्रिय स्वतन्त्र पार्टी (रास्वपा) की उम्मेदवार बिना गुरुङले भारी मतान्तरसहित विजय हासिल गरेकी छन् । व्यवसाय र समाजसेवाको पृष्ठभूमिबाट राजनीतिमा प्रवेश गरेकी बिनाले ३७ हजार ७५० मत प्राप्त गर्दै संसद प्रवेश गरेकी हुन् । यो जितसँगै उनी गण्डकी प्रदेशमा रास्वपाबाट निर्वाचित एकमात्र महिला सांसद बनेकी छन् ।

कुल ६५ हजार ४०७ मत खसेको यस क्षेत्रमा बिनाले निकटतम प्रतिद्वन्द्वी नेपाली कांग्रेसका मनोज गुरुङलाई २४ हजार ९७० मतको अन्तरले पराजित गरिन् । मनोजले १२ हजार ७८० मत मात्र प्राप्त गरे । तेस्रो स्थानमा नेकपा (एमाले) का दामोदर बैरागी रहे, जसले ७ हजार ९०६ मत पाए ।

अन्य उम्मेदवारहरूमा नेपाली कम्युनिस्ट पार्टीका गोपाल गिरीले १ हजार ४५६, राष्ट्रिय प्रजातन्त्र पार्टी (राप्रपा) का अर्जुन खनालले १ हजार ४०६, श्रम संस्कृति पार्टीका हितकाजी गुरुङले ५८६ र उज्यालो नेपाल पार्टीका तर्कबहादुर गुरुङले ४६३ मत प्राप्त गरे । नेकपा (माओवादी) का कमल खड्का विश्वकर्मा लगायत साना दलका उम्मेदवारहरूको मत भने नगण्य रह्यो ।

कास्की क्षेत्र नं. ३ बाट रास्वपाकी बिना गुरुङ विजयी भए पश्चात् आफ्ना कार्यकर्ताहरुसँग खुशी साट्दैं । तस्विर: राम गुरुङ

बिनाको यो जितलाई वैकल्पिक राजनीतिप्रतिको बढ्दो आकर्षण र जनजाति तथा महिला प्रतिनिधित्वको सफलताका रूपमा हेरिएको छ । रास्वपाको कास्की कोषाध्यक्षसमेत रहेकी बिना पहिलो पटक चुनावी मैदानमा उत्रिएकी थिइन् । उनको पारिवारिक पृष्ठभूमि आर्थिक रूपमा सम्पन्न छ भने उनी सञ्जीवनी सिस्टर्स एसोसिएसनकी संस्थापक अध्यक्षका रूपमा महिलाहरूको सशक्तीकरण र बालबालिकाको क्षेत्रमा सक्रिय छिन् ।

यस संस्थामार्फत उनले सयौं महिलालाई तालिम, सहयोग र सशक्तीकरणका काम गरेकी छन् । यसबाहेक, तमुधिं नेपालको केन्द्रीय सदस्य, लायन्स क्लब, सिर्जना संसार कोसेली घर, तमु सांस्कृतिक प्रतिष्ठान र कोपिला नेपाल जस्ता संस्थाहरूसँगको आवद्धताले उनको सामाजिक सक्रियता झल्काउँछ । विभिन्न व्यावसायिक प्रतिष्ठानमा निर्देशकका रूपमा काम गरेकी बिनाले आफ्नो अनुभवलाई राजनीतिक यात्रामा रूपान्तरण गरिन् ।

चुनावी प्रतिस्पर्धामा बिनाका प्रमुख चुनौतीहरू सांगठनिक रूपमा बलिया दलहरू थिए । नेकपा (एमाले) ले पुरानो उम्मेदवार दामोदर बैरागीलाई दोहो¥याएको थियो, जसले अघिल्लो चुनावमा २२ हजार ९८० मतसहित जितेका थिए । नेपाली कांग्रेसले मनोज गुरुङलाई अगाडि सारेको थियो, जसले पार्टीको सुधारिएको छविलाई जोड दिएका थिए ।

नेपाली कम्युनिस्ट पार्टीबाट गोपाल गिरी वैचारिक र शालीन उम्मेदवारका रूपमा मैदानमा थिए । राप्रपाबाट अर्जुन खनालले आफ्नो एमाले पृष्ठभूमि र पुरातन मत आधारलाई जोडेर प्रतिस्पर्धा गरेका थिए । उज्यालो नेपालबाट तर्कबहादुर गुरुङ र नेकपा (माओवादी) बाट कमल खड्का विश्वकर्मा जस्ता उम्मेदवारहरूले पनि मत विभाजनको जोखिम बढाएका थिए । तर, जेनजी आन्दोलनको जगमा उभिएको रास्वपाको तल्लो तहबाटै बढेको आकर्षण, बिनाको सामाजिक कामको अनुभव र गुरुङ समुदाय तथा महिलाहरूको समर्थनले उनलाई जित दिलायो ।