धादिङ, १० फागुन । पोखराबाट काठमाडौँतर्फ जाँदैं गरेको यात्रुवाहक बस आज सोमबार बिहान त्रिशूली नदीमा खसेको छ । दुर्घटनामा परी कम्तीमा १७ जनाको मृत्यु भएको छ भने अन्य केही घाइते भएका छन् ।

धादिङ जिल्ला ट्राफिक प्रहरी कार्यालयका प्रमुख शिशिर थापाका अनुसार घटनामा १७ जनाको ज्यान गएको पुष्टि भएको छ । मृत्यु हुनेमा ४ जना महिला र १३ जना पुरुष रहेका छन् ।

दुर्घटना बेनीघाट रोराङ गाउँपालिकाको चरौँदी नजिकैको चाइनाधाराबाट भएको हो । ग २ ख १४२१ नम्बरको उक्त बस मध्यराति करिब १:१५ बजे तिर सडकबाट अनियन्त्रित भई त्रिशूली नदीमा खसेको प्रारम्भिक जानकारी प्राप्त भएको छ ।

बसमा ३५ भन्दा बढी यात्रु सवार रहेको बताइएको छ । राजमार्ग उद्धार व्यवस्थापन समितिका अध्यक्ष राजकुमार ठकुरीका अनुसार २३ जना घाइतेलाई उद्धार गरी उपचारका लागि विभिन्न अस्पतालमा पठाइएको छ ।

नेपाली सेना, सशस्त्र प्रहरी, नेपाल प्रहरी र स्थानीयवासीको संयुक्त टोलीले उद्धार कार्य जारी राखेको छ । घटना रातिको समयमा भएकोले अँध्यारो र चिसोका कारण उद्धारमा निकै कठिनाइ भएको छ । अझै पनि केही व्यक्ति बेपत्ता रहेको आशंका गरिएको छ र खोजी कार्य जारी छ ।

दुर्घटनाको कारणबारे भने प्रहरीले विस्तृत अनुसन्धान गरिरहेको छ । घटनास्थलको अवस्था र उद्धार कार्यका कारण पूर्ण विवरण अझै सार्वजनिक भएको छैन ।