पोखरा । प्रतिबन्धित नेपाल कम्युनिष्ट पार्टी निकट विद्यार्थी संगठन अखिल क्रान्तिकारी जिल्ला समिति कास्कीले सातौं पार्टी पुनर्गठन दिवसको पूर्वसन्ध्यामा पोखरामा कोणसभा कार्यक्रम सम्पन्न गरेको छ ।

अखिल क्रान्तिकारीका नेता प्रकाश बाँस्तोलाले लक्ष्मी माध्यमिक विद्यालय शिशुवामा आयोजना गरिएको कोणसभालाई सम्बोधन गर्दै एकीकृत जनक्रान्ति सफल पार्नका लागि देशभरीका विद्यार्थी तथा युवाहरु एकजुट भएर अघि बढ्नु पर्नेमा जोड दिए । विद्यार्थी नेता बाँस्तोलाले कोरोना संक्रमणको महामारीमा पनि सरकार सत्ता र कुर्चीको लोभमा आन्तरिक द्वन्द्वमा कुहिरोको काग बनिरहेको भन्दै देश र जनताको मुक्तिका लागि एकीकृत जनक्रान्ति नै एकमात्र विकल्प भएको धारणा व्यक्त गरे ।

त्यसैगरी अखिल क्रान्तिकारीका नेता पुरन मगरले क्रान्तिको बाटो कठिन भएपनि त्यसले मात्र देश र जनताको मुक्ति सम्भव हुने हुँदा गोलबद्ध भएर अखिल क्रान्तिकारीमा आवद्ध हुन सबै विद्यार्थीहरुलाई आग्रह गरे । नेता मगरले राज्यको दमन जति बढ्दै जान्छ, क्रान्तिको राप पनि त्यति नै तेजिलो बन्दै जाने विचार व्यक्त गरे ।