पोखरा, ५ माघ । राष्ट्रिय स्वतन्त्र पार्टी (रास्वपा)ले कास्की क्षेत्र नम्बर २ बाट उत्तम पौडेललाई प्रतिनिधिसभा सदस्यको टिकट दिएको छ। पार्टीभित्र चर्को प्रतिस्पर्धा र रस्साकस्सी भए पनि अन्तिममा पौडेललाई उम्मेदवार बनाउने निर्णय गरिएको हो।

पौडेल पत्रकारिता पृष्ठभूमिबाट आएका पार्टी सभापति रवि लामिछानेका सबैभन्दा नजिकका प्रिय पात्र हुन् । यस क्षेत्रबाट टिकटका लागि माधव कँडेल, अशोक खड्का, योगेन्द्र केसी लगायतका नेताहरूले पनि दाबी गरेका थिए। यसअघि भएको निर्वाचनमा रास्वपाले कास्की २ बाट प्रत्यक्षतर्फ १२ हजार ४ सय ९५ मत प्राप्त गरेको थियो। त्यसबेला नेकपा (एमाले)की उम्मेदवार विद्या भट्टराई ले १६ हजार ९ सय ९८ मत ल्याएर विजयी भएकी थिइन्। रास्वपाले विभिन्न क्षेत्रमा उम्मेदवारहरूको टुंगो लगाइरहेको क्रममा यो निर्णय आएको हो।