सिन्धुली, ९ पुस । सिन्धुलीको कमलामाई नगरपालिका–४, धुराफाँटकी ३२ वर्षीया सुशीला घिसिङ बम्जनको हत्या परिवारका सदस्यहरूले नै गरेको प्रहरी अनुसन्धानबाट खुलेको छ। गत आइतबार अपराह्न साढे ४ बजे भएको घटनामा सासू, ससुरा र नन्दले सुशीलालाई घरको भान्साकोठामा थुनेर शरीरमा पेट्रोल छर्की आगो लगाएका थिए। सुरुमा परिवारले यो आत्मदाह भएको प्रचार गरेका थिए।

प्रहरीले पक्राउ गरेका नन्द ३५ वर्षीया मीना बम्जनले प्रारम्भिक बयानमा पेट्रोल छर्केर आगो लगाएको स्वीकार गरेकी छिन्। सासू ६० वर्षीया मायाँरानी बम्जन पनि पक्राउ परेकी छिन् भने आगो लगाउने क्रममा आफैं घाइते भएका ससुरा ६५ वर्षीय दुर्गामान बम्जन अस्पतालमा प्रहरी निगरानीमा उपचाररत छन्। सुशीलाका पति सूर्यबहादुर बम्जन वैदेशिक रोजगारीमा कोरिया रहेका र हत्या योजनामा उनको पनि संलग्नता हुन सक्ने प्रहरीको आशंका छ।

घटनास्थलबाट दुई बोतल पेट्रोल, लाइटर र बाँसको भाटामा बेरेको राँको (पुल्ठो) बरामद भएको छ। हत्या गर्नुअघि परिवारले घरको मूल गेट भित्रबाट ताला लगाएका थिए, जसले गर्दा हारगुहार सुनेर आएका छिमेकीहरू समयमा भित्र छिर्न सकेनन्। पछि साँचो झारेपछि गेट खोलिए पनि सुशीलाको घटनास्थलमै मृत्यु भइसकेको थियो।

सुशीलामाथि लामो समयदेखि घरेलु हिंसा हुँदै आएको थियो। करिब ६–७ वर्षदेखि सासू, ससुरा र नन्दबाट शारीरिक तथा मानसिक यातना, खान–लगाउन नदिने, मोबाइल प्रयोग गर्न नदिने र घर छोड्न दबाब दिँदै आएका थिए। पछिल्लो दुई महिनायता नन्द मीनाले मार्ने धम्की दिँदै आएकी थिइन् र घटनाको एक घण्टा अघि मात्र सुशीलाले आफन्तलाई फोन गरेर यो कुरा जानकारी गराएकी थिइन्।

सुशीलाका तीन साना छोराछोरी (सात वर्षअगाडि तिम्ल्याहा जन्मिएका) घटना हुँदा ट्युसन पढ्न गएका थिए। सुशीलाले नै उनीहरूलाई ट्युसन पुर्‍याएर घर फर्किएकी थिइन्। हत्यापछि बालबालिकाहरू हाल मामाघरमा छन्।

मृतकका बुवा प्रेमबहादुर घिसिङले सोमबार किटानी जाहेरी दिएपछि मीना र मायाँरानी पक्राउ परेका हुन्। मुद्दा कर्तव्य ज्यान शीर्षकमा दर्ता भई जिल्ला अदालतबाट पाँच दिन म्याद थपेर अनुसन्धान भइरहेको सिन्धुली प्रहरी प्रमुख एसपी लालध्वज सुवेदीले जानकारी दिए। मंगलबार नेपाल महिला संघलगायतका संस्थाहरूले प्रमुख जिल्ला अधिकारीलाई ज्ञापनपत्र बुझाउँदै घटनामा संलग्न सबैलाई कडा कारबाही र निष्पक्ष अनुसन्धानको माग गरेका छन्।