पोखरा । नेत्र विक्रम चन्द ‘विप्लव’ नेतृत्वको प्रतिबन्धित नेपाल कम्युनिष्ट पार्टीले ७ औं पार्टी पुनर्गठन दिवसका अवसरमा देशव्यापी रुपमा विभिन्न कार्यक्रमहरुको आयोजना गरेको छ । नेपाल कम्युनिष्ट पार्टी कास्कीका सेक्रेटरी विश्वासले दिएको जानकारी अनुसार पार्टी पुनर्गठनको अवसरमा जिल्लाभरीका महानगरपालिका, गाउँपालिका र वडाहरुमा एकीकृत जनक्रान्तिको झण्डालाई उच्च पारौं भन्दै पर्चा र पम्प्लेटहरु टाँसिएको हो ।

‘संसारका श्रमजीवी तथा उत्पीडित जनता एकजुट होऔं’ । ‘माक्र्सवाद, लेनिनवाद, माओवाद जिन्दावाद’। ‘एकीकृत जनक्रान्ति जिन्दावाद ‘। ‘एकीकृत जनक्रान्तिको झण्डालाई उच्च पारौं ‘। ७ औं पार्टी पुनर्गठन दिवस भव्य रुपमा मनाऔं भन्दै हातमा झण्डा, मादल र बन्दुक बोकेका छापामार तथा जनताहरुको तस्विर कोरिएको जनयुद्ध कैं झल्को दिने खालको पर्चा र पम्प्लेट व्यापक रुपमा प्रतिबन्धित नेकपाले ठाउँ–ठाउँमा टाँसेको छ ।

नेकपाका सेक्रेटरी विश्वासले पोखरा महानगरपालिका, रुपा गाउँपालिका, माछापुच्छ्रे गाउँपालिका लगायत कास्कीका विभिन्न क्षेत्रहरुमा देशव्यापी घोषित कार्यक्रम अनुसार नै पार्टी पुनर्गठन दिवसको प्रचारप्रसार अभियानलाई सफल पारिएको दावी गरे ।
प्रतिबन्धित नेकपाले ६ गते देशभर पार्टी पुनर्गठन दिवसको प्रचारप्रसार तथा अतिरिक्त क्रियाकलाप गर्ने, ७ गते देशव्यापी प्रदर्शन तथा जनसभा गर्ने र ८ गते पार्टी पुनर्गठनको दिन देशभर उत्सव मनाउने कार्यक्रम सार्वजनिक गरेको छ ।