पोखरा, १४ कार्तिक । जिल्ला प्रशासन कार्यालय कास्कीले उच्च हिमाली क्षेत्रमा भारी हिमपात र वर्षाको उच्च सम्भावना रहेको भन्दै मौसम पूर्ण रूपमा सफा नभएसम्म पदयात्रामा ननिस्कन पर्यटकहरूलाई कडा आग्रह गरेको छ।

बिहीबार जारी सार्वजनिक सूचनामा जल तथा मौसम विज्ञान विभागको पूर्वानुमानलाई आधार मान्दै गण्डकी प्रदेशमा मध्यमदेखि भारी वर्षा तथा हिमपात हुने प्रक्षेपण गरिएको उल्लेख छ। यसै सन्दर्भमा अन्नपूर्ण आधार शिविर, मर्दी हिमाल आधार शिविर, मोडल माछापुच्छ्रे ट्रेक, कपुचे पदयात्रा र खुमईलगायतका लोकप्रिय हिमाली मार्गमा यात्रा नगर्न तथा अत्यधिक सतर्कता अपनाउन प्रशासनले निर्देशन दिएको सहायक प्रमुख जिल्ला अधिकारी शिवप्रसाद लम्सालले जानकारी दिए।

यसैबीच, प्रशासनले जिल्लाका विभिन्न ग्रामीण सडकखण्डमा पनि रातिको समयमा यातायात सञ्चालनमा अस्थायी रोक लगाएको छ। विरेठाँटी–घान्द्रुक, विरेठाँटी–उल्लेरी, लुम्ले–लान्द्रुक र काहुँखोला–ताङतिङ–सिक्लेस सडकमा भोलि बिहानसम्म रातको समयमा सवारी सञ्चालन पूर्ण प्रतिबन्धित गरिएको छ।

वर्षातको मौसममा राष्ट्रिय राजमार्ग तथा ग्रामीण सडकमा चल्ने सबै सवारीसाधनलाई क्षमताभन्दा बढी यात्रु नबोक्न र संयमित गतिमा सवारी चलाउन प्रशासनले चालक तथा यातायात व्यवसायीलाई सचेत गराएको छ।

कुनै पनि विपद्जन्य घटना भएमा तत्काल सम्बन्धित स्थानीय तह, जनप्रतिनिधि, नजिकको प्रहरी चौकी वा सुरक्षा निकायमा सम्पर्क गर्न समेत सबैलाई अनुरोध गरिएको छ। प्रशासनले मौसम सुधार नभएसम्म उच्च सतर्कता अपनाउन जोड दिएको छ।