पोखरा, ११ कार्तिक । अन्नपूर्ण आधार शिविर पदयात्रामा पूर्ण रूपमा रोक लगाइएको छ। क्षेत्रमा निरन्तर वर्षा र हिमपात भइरहेकाले यस्तो निर्णय लिइएको हो।

केही पदयात्रीहरू माथि उक्लिन वा तल झर्न नसकेर फसेका छन्। उनीहरूलाई सुरक्षित स्थानमा ल्याउन नेपाल प्रहरी, सशस्त्र प्रहरी बल र स्थानीय उद्धारकर्मी इन्द्र शेरचन थकालीसहितको टोली परिचालित भएको छ। यो टोली अन्नपूर्ण गाउँपालिकासँग समन्वय गरेर काम गरिरहेको छ।

उद्धार टोलीका सदस्य शेरचनका अनुसार विभिन्न ठाउँमा पर्यटक फसेको सूचना आएकाले उद्धार कार्य तीव्र पारिएको छ। आवश्यक सहयोग वा सूचना चाहिएमा प्रहरी कन्ट्रोल १०० नम्बर वा नजिकको प्रहरी चौकी वा अन्नपूर्ण गाउँपालिकाका प्रतिनिधिलाई सम्पर्क गर्न गाउँपालिकाले आग्रह गरेको छ।