काठमाडौँ, १० कार्तिक । सरकारले २३ र २४ भदौमा जेन–जी आन्दोलन र त्यसपछिको हिंसात्मक प्रदर्शनमा ज्यान गुमाएका ५३ जनाका परिवारलाई १५ लाख रुपैयाँका दरले राहत वितरण गरेको छ। तर, कारागारबाट भाग्ने क्रममा सुरक्षाकर्मीको गोलीबाट मृत्यु भएका कैदीबन्दी र पहिचान नखुलेका शवका परिवारलाई राहत प्रदान गरिएको छैन।

गृह मन्त्रालयका अनुसार, अर्थ मन्त्रालयले राहतका लागि ७ करोड ९५ लाख रुपैयाँ निकासा गरेको छ। मन्त्रालयका सूचना अधिकारी रवीन्द्र आचार्यले भने, ‘२३ र २४ भदौमा प्रहरीको गोली, उपचारका क्रममा वा हिंसात्मक प्रदर्शनमा ज्यान गुमाएका ५३ जनाका परिवारलाई सहिद सरह राहत उपलब्ध गराइएको छ।’ यो रकम सम्बन्धित जिल्ला प्रशासन कार्यालयमार्फत वितरण गरिएको छ।

प्रहरी तथ्यांकअनुसार, जेन–जी आन्दोलन र त्यसपछिको हिंसामा ७६ जनाको मृत्यु भएको छ। जसमा २३ भदौमा काठमाडौं र सुनसरीमा २२ जनाको मृत्यु भएको थियो। २४ भदौ र उपचारका क्रममा थप केहीको ज्यान गएको थियो। कारागारबाट भाग्ने क्रममा १० कैदीबन्दी र प्रदर्शनकारीको कुटाइबाट ३ प्रहरीको मृत्यु भएको थियो। काठमाडौं, विराटनगर र इटहरीका भाटभटेनी भवनमा आगलागीपछि जलेर १३ शवको पहिचान हुन बाँकी छ।

गृह मन्त्रालयले पहिचान नखुलेका मृतकको आन्दोलनसँग सम्बन्ध पुष्टि भएमा थप निर्णय गर्ने जनाएको छ।