पोखरा, २ कात्तिक । कास्कीको पोखरा महानगरपालिका–२२, अनदु जंगलमा एक जर्मनी नागरिकमाथि धारिलो हतियार (खुकुरी) देखाएर अभद्र व्यवहार गरेको आरोपमा दुईजना पक्राउ परेका छन्।

पक्राउ पर्नेमा कास्कीको माछापुच्छ्रे गाउँपालिका–८ का २४ वर्षीय नविन वि.क. र तनहुँको व्यास नगरपालिका–५ का २१ वर्षीय विशाल दर्लामी छन्।  आज आइतबारबिहान ९:१० बजे ६७ वर्षीय जर्मनी नागरिक एन्स पिटर मार्टिनलाई एक्लै हिँडिरहेको अवस्थामा खुकुरी देखाएर हातपात र अभद्र व्यवहार भएको सूचनापछि वडा प्रहरी कार्यालय बैदामबाट खटिएको प्रहरी टोलीले घटनामा संलग्न दुईजनालाई खुकुरीसहित नियन्त्रणमा लिएको हो।

उनीहरूमाथि अभद्र व्यवहारसम्बन्धी मुद्दामा जिल्ला प्रशासन कार्यालय कास्कीबाट १० दिनको म्याद थप गरी अनुसन्धान भइरहेको जिल्ला प्रहरी कार्यालय कास्कीका प्रवक्ता प्रहरी नायब उपरीक्षक हरिबहादुर बस्नेतले जानकारी दिए।