पोखरा, १९ भदौ । जिल्ला प्रहरी कार्यालय कास्कीले पोखरा महानगरपालिका–८ जाल्पा रोड क्षेत्रमा सञ्चालित विभिन्न खाजा घरहरूमा अनैतिक क्रियाकलाप सञ्चालन गरेको आरोपमा चार जनालाई पक्राउ गरेको छ । प्रहरीले घटनास्थलबाट ११ जना महिलालाई उद्धार गरी कोपिला नेपाल संस्थामा पठाएको छ । पक्राउ पर्नेहरूमा एक महिला र तीन पुरुष रहेका छन् ।

प्रहरीका अनुसार, भदौ १७ गते दिउँसो करिब ३ः४५ बजे खाजा घरहरूमा होहल्ला र अनैतिक गतिविधि भइरहेको गोप्य सूचनाका आधारमा जिल्ला प्रहरी कार्यालय कास्कीबाट विशेष टोली खटिएको थियो । सो क्रममा खाजा घर सञ्चालकहरूले अनैतिक क्रियाकलापमा संलग्न रहेको पुष्टि भएपछि उनीहरूलाई नियन्त्रणमा लिइएको हो । घटनास्थलमा प्रहरीले छापा मार्दा विभिन्न अनियमितता फेला परेको बताइएको छ ।

जिल्ला प्रशासन कार्यालय कास्कीबाट सार्वजनिक हित, स्वास्थ्य, सुरक्षा, सुविधा तथा नैतिकता विरुद्धको कसुरमा सात दिनको म्याद थप गरी अनुसन्धान अगाडि बढाइएको छ । यसबारे जानकारी दिँदै जिल्ला प्रहरी कार्यालय कास्कीका प्रवक्ता डीएसपी हरिबहादुर बस्नेतले भने, “अनैतिक क्रियाकलापलाई नियन्त्रण गर्न प्रहरी निरन्तर सक्रिय छ । यो घटनाले समाजमा व्याप्त यस्ता गतिविधिप्रति सतर्कता बढाउनुपर्ने आवश्यकता औंल्याएको छ ।“

पक्राउ पर्नेहरूमा चितवन जिल्ला घर भई हाल पोखरा महानगरपालिका–८ जाल्पा रोड बस्ने २८ वर्षीया सुनिता तामाङ पहिलो नाममा छन् । उनी खाजा घर सञ्चालनमा मुख्य भूमिका निर्वाह गरेको प्रहरीको दाबी छ । दोस्रोमा तनहुँ जिल्लाको व्यास नगरपालिका–८ घर भई हाल पोखरा महानगरपालिका–८ सृजना चोक बस्ने १९ वर्षीय सुवास गुरुङ रहेका छन् । यसैगरी, बाग्लुङ जिल्लाको जैमिनी नगरपालिका–८ घर भई हाल पोखरा महानगरपालिका–८ न्यू रोड बस्ने २१ वर्षीय सागर थापा मगर र सोही ठाउँका २१ वर्षीय शंकर थापा पनि पक्राउ परेका छन् । यी दुवै जनाले खाजा घर सञ्चालनमा सहयोग गरेको प्रारम्भिक अनुसन्धानबाट खुलेको छ ।

प्रहरीले घटनाको थप अनुसन्धान जारी राखेको छ भने उद्धार गरिएका महिलाहरूको सुरक्षा र पुनस्र्थापनाका लागि आवश्यक प्रक्रिया अगाडि बढाइएको छ । यस घटनाले पर्यटकीय शहर पोखरामा यस्ता अनैतिक क्रियाकलाप बढ्दै गएकोतर्फ ध्यानाकर्षण गराएको छ । स्थानीयवासीहरूले प्रहरीको यो कारबाहीलाई स्वागत गर्दै यस्ता गतिविधिविरुद्ध थप कडाइ गर्न माग गरेका छन् ।