पोखरा, १५ भदौ । र्‍यान्डम रिडर्स सोसाइटीको सातौँ अधिवेशन तथा पन्ध्रौँ साधारण सभाले दीपक पराजुलीको अध्यक्षतामा नयाँ कार्यसमिति चयन गरेको छ । शनिबार पोखरामा भएको अधिवेशनले पराजुलीको अध्यक्षतामा १२ सदस्यीय नयाँ कार्यसमिति सर्वसम्मत चयन गरेको हो।

र्‍यान्डम रिडर्स सोसाइटीको नयाँ कार्यसमिति  ।

समितिको उपाध्यक्षमा नेपालप्रकाश अधिकारी र गौरी तमु, सचिवमा ध्रुव केसी, कोषाध्यक्षमा भरत कोइराला र सहसचिवमा बाबुराम सुवेदी चयन भएका छन्। त्यस्तै, सदस्यहरूमा हसिना बस्नेत, खिम लामिछाने ‘काजी’, विष्णु सुवेदी, रामजीप्रसाद आचार्य, निकिता भट्टराई र शङ्करमणि त्रिपाठी ‘छन्दमणि’ चयन भएका छन्। केशवशरण लामिछानेको संयोजकत्वमा गणेश पौडेल र रामजी पौडेल सदस्य रहेको निर्वाचन मण्डलले निर्वाचन प्रक्रिया सम्पन्न गरेको थियो। नवनिर्वाचित कार्यसमितिलाई पूर्वअध्यक्ष उपेन्द्र पौडेलले शुभकामना दिए।
यसअघि, सोसाइटीका निवर्तमान अध्यक्ष रुपिन्द्र प्रभावीको अध्यक्षतामा भएको उद्घाटन सत्रमा पूर्वअध्यक्ष गणेश पौडेलले पठन संस्कृति विकासमा सोसाइटीको योगदानबारे चर्चा गरे। कार्यक्रममा पुस्तक छनोट समितिका पूर्वसंयोजक कृष्ण केसी, पुतली बजार प्रज्ञा प्रतिष्ठानका उपकुलपति दुर्गाबहादुर शाह ‘बाबा’ लगायतले शुभकामना व्यक्त गरे।

साधारण सभाले सचिव नेपालप्रकाश अधिकारीले प्रस्तुत गरेको प्रगति प्रतिवेदन र कोषाध्यक्ष ध्रुव केसीले प्रस्तुत गरेको आर्थिक प्रतिवेदन सर्वसम्मत पारित गरेको छ। पठन संस्कृतिको प्रवर्द्धनमा सक्रिय र्‍यान्डम रिडर्स सोसाइटीले हरेक महिनाको अन्तिम शनिबार कुनै कृति वा विषयमा छलफल र परिचर्चा आयोजना गर्दै आएको छ।