काठमाडौं, १९ साउन । राष्ट्रिय परीक्षा बोर्डले सोमबार कक्षा १२ को नतिजा सार्वजनिक गरेको छ। गत वर्षको तुलनामा ९ प्रतिशतले सुधार हुँदै यस वर्ष ६१.१७ प्रतिशत विद्यार्थी उत्तीर्ण भएका छन्। गत वर्ष यो संख्या ५२ प्रतिशत मात्र थियो। बोर्डका अध्यक्ष महाश्रम शर्माले नतिजा उत्साहजनक भएको बताए।

यो वर्ष वैशाखमा देशभर सञ्चालित परीक्षामा ५ लाख ११ हजार विद्यार्थी सहभागी थिए। जसमा नियमिततर्फ ३ लाख ९६ हजार ३४७ र आंशिकतर्फ १ लाख १४ हजार ६४० जना थिए। नियमिततर्फ २ लाख ४२ हजार ४६५ (६१.१७%) र आंशिकतर्फ ४१ हजार ८४० (३६.४९%) विद्यार्थी उत्तीर्ण भएका छन्। तर, १ लाख ५३ हजार ८८२ विद्यार्थी भने ननग्रेड भए।

परीक्षा १,५९१ केन्द्रमार्फत सञ्चालन भएको थियो। काठमाडौंबाट ६८ हजार र मनाङबाट ४५ जनाले परीक्षा दिए भने जापानको एभरेस्ट स्कूलका ३८ विद्यार्थी पनि सहभागी थिए। नेपाल शिक्षक महासंघको आन्दोलनका कारण वैशाख ११ बाट तोकिएको परीक्षा १० दिन ढिला भएको थियो। जेठ २ मा परीक्षा सम्पन्न भएपछि उत्तरपुस्तिका परीक्षण सुरु भएको थियो।

नतिजामा १३,५०२ विद्यार्थीले ३.६१ देखि ४.०० जीपीए प्राप्त गरेका छन्। त्यस्तै, ३.२१–३.६० जीपीए ल्याउने ५५,८९६, २.८१–३.२० जीपीए ल्याउने ६९,८१२, २.०१–२.४० जीपीए ल्याउने ८,९६४ र १.६१–२.०० जीपीए ल्याउने २३ जना छन्। बोर्डका अनुसार अंग्रेजी, लेखा, सामाजिक र नेपाली विषयमा धेरै विद्यार्थी ननग्रेड भएका छन्। लेटर ग्रेडिङ निर्देशिका २०७८ अनुसार सैद्धान्तिकतर्फ न्यूनतम ३५% अंक नल्याउने विद्यार्थी ननग्रेड हुन्छन्। नतिजा राष्ट्रिय परीक्षा बोर्ड र नेपाल टेलिकमको वेबसाइटमार्फत हेर्न सकिन्छ।