काठमाडौं, ५ साउन । अख्तियार दुरुपयोग अनुसन्धान आयोगले ७८ लाख रुपैयाँको ‘घुस डिल’ सम्बन्धी अडियो काण्डमा मुछिएका पूर्वमन्त्री राजकुमार गुप्तालाई अनुसन्धानका लागि बोलाएको छ। मन्त्री गुप्तालाई पोखरा–१६, बाटुलचौरमा रहेको १३५ रोपनी जमिनका सम्बन्धमा अदालतको फैसला कार्यान्वयन गराउने भन्दैं विचौंलिया सुजन लामाले लाखौं रुपैयाँ घुस दिएका थिए । यस अडियो रेकर्डमा पूर्वमन्त्री रञ्जिता श्रेष्ठको पनि संलग्नता देखिएको थियो ।

आयोगका एक अधिकारीका अनुसार, सङ्घीय मामिला तथा सामान्य प्रशासनमन्त्रीबाट राजीनामा दिएका गुप्तालाई भोलिसम्म (साउन ७ गते) आयोगमा हाजिर हुन निर्देशन दिइएको छ। यद्यपि, आयोगले यो विषयमा आधिकारिक पुष्टि गरेको छैन।

आयोगका प्रवक्ता राजेन्द्रकुमार पौडेलले गुप्तालाई बोलाएको हुन सक्ने तर मिति र विवरणबारे अहिले खुलाउन नमिल्ने बताए। “यो ठूलो विषय होइन, तर कहिले र कुन मितिमा बोलाइयो भन्ने अहिले भन्न सकिँदैन,” उनले भने। आयोगका अर्का कर्मचारीका अनुसार, गुप्तालाई अडियोमा सुनिएको उनको आवाज र घुस काण्डबारे सोधपुछका लागि ‘अनुसन्धान’ को हिस्सा बनाइएको हो।

गुप्तामाथि ७८ लाख रुपैयाँ घुस मागेको अडियो सार्वजनिक भएपछि चौतर्फी दबाब बढेको थियो। यो काण्डमा भूमि व्यवस्था तथा सहकारी मन्त्री बलराम अधिकारी र तत्कालीन सचिवको नाम पनि जोडिएको छ । गुप्ताले अनुसन्धानमा सहयोग पुगोस् भन्दै साउन १ गते राजीनामा दिएका थिए।

प्रधानमन्त्री केपी शर्मा ओलीका निकट भएकै कारण सहकारीमन्त्री अधिकारीमाथि कारवाही भने हुन सकिरहेको छैन । विचौंलियासँग मन्त्री अधिकारी र उनका छोरासहित तत्कालिन सचिवले रकम बुझेको अडियो सार्वजनिक भएको थियो ।