काठमाडौं, २४ असार । नेपाल चिकित्सक संघले सुरु गरेको आन्दोलन सरकारले वार्ता गरेर स्थगित गराइएको छ।

स्वास्थ्य मन्त्रालयमा मंगलबार साँझ भएको छलफलपछि सरकार र संघबीच सहमति जुटेको हो। वार्तामा स्वास्थ्य मन्त्री प्रदीप पौडेल, कानुन मन्त्री अजय चौरसिया, उद्योग मन्त्री दामोदर भण्डारी र चिकित्सक संघका पदाधिकारीहरू सहभागी थिए।

सहमति अनुसार, संघले घोषणा गरेका सबै आन्दोलनका कार्यक्रमहरू फिर्ता लिएको छ।

नेपाल चिकित्सक संघले उपभोक्ता अदालतको पछिल्लो फैसलाले नेपाल मेडिकल काउन्सिलको अधिकारक्षेत्रमा हस्तक्षेप भएको भन्दै सोमबारदेखि आकस्मिकबाहेकका सबै सेवा बन्द गर्ने आन्दोलन थालेको थियो।

चिकित्सकहरूले उपभोक्ता ऐन र मुलुकी ऐन ९फौजदारी० संशोधन गर्नुपर्ने, चिकित्सकीय लापरबाहीका मुद्दामा कानुनी स्पष्टता ल्याउनुपर्ने जस्ता माग राखेका थिए।

केही हप्तादेखि उपभोक्ता अदालतले उपचारमा लापरबाही भएको भन्दै अस्पताल र चिकित्सकमाथि क्षतिपूर्ति तिराउने निर्णय गर्दै आएको छ।ओम अस्पताललाई ५० लाख ७० हजार, हिमाल अस्पताल र चिकित्सकहरूलाई १ करोड ४५ लाख र ग्रान्डी सिटी अस्पताल र चिकित्सकलाई ५७ लाख रुपैयाँ क्षतिपूर्ति तिर्नुपर्ने फैसला उपभोक्ता अदालतले गरेको थियो।

यिनै फैसलाप्रति असन्तुष्टि जनाउँदै चिकित्सकहरू आन्दोलनमा उत्रिएका थिए।