रसुवा, २४ असार । मंगलबार बिहान आएको भीषण बाढीले रसुवाको भोटेकोसी नदी किनारमा ठुलो क्षति पु¥याएको छ। बाढीले ३ जना प्रहरी, ९ जना नेपाली सर्वसाधारण र ६ जना चिनियाँ नागरिकलाई बगाएको आशंका गरिएको छ। हालसम्म उनीहरू सम्पर्कविहीन छन्।

रसुवाका प्रमुख जिल्ला अधिकारी अर्जुन पौडेलका अनुसार बाढीले भन्सार यार्ड क्षेत्रमा रहेका धेरैलाई बगाएको हो। बेपत्तामा परेका प्रहरीहरूमा असई लालबहादुर श्रेष्ठ, मुन्ना ठाकर र लोकेन्द्र बोहरा छन्।

बाढीले मितेरी पुल पनि बगायो
नेपाल–चीन व्यापारका लागि अत्यन्त महत्वपूर्ण मानिने मितेरी पुल बाढीले बगाएको छ। त्यससँगै भन्सार यार्डमा रहेका कन्टेनर, सवारीसाधन र टिमुरे ईभी चार्जिङ स्टेशनमा पनि ठूलो क्षति पुगेको प्रहरीले जनाएको छ। रसुवागढी जलविद्युत आयोजनाको ड्यामसमेत क्षतिग्रस्त भएको छ।

उद्धारमा कठिनाई
सशस्त्र प्रहरी बलका अनुसार बाढीका कारण केहीको उद्धार गर्न सकिए पनि अझै थुप्रै फसेका छन्। चारैतिरबाट पानी आइरहेको हुँदा उद्धार कार्य कठिन बनेको छ। हाल ९४ जना प्रहरी परिचालन गरिएको छ।

बाढीका कारण धुन्चेदेखि टिमुरेसम्मको सडक अवरुद्ध भएको छ। यसले रसुवाको आवतजावत र आपतकालीन सहायता कार्यमा थप कठिनाइ थपेको छ।

चिनियाँ भूभागमा वर्षाले ल्यायो बाढी
प्रशासनका अनुसार चीनतर्फको भिषण वर्षाका कारण भोटेकोसीमा पानीको सतह एक्कासी बढेर बाढी आएको हो। नदीको बहाव अझै बढिरहेकाले स्थानीय बासिन्दालाई सतर्कता अपनाउन प्रशासनले आग्रह गरेको छ।

स्थिति अझै जटिल छ। उद्धार कार्य जारी छ। बेपत्ताको खोजी र क्षतिको मूल्याङ्कन भइरहेको छ।