लेखनाथ, २० जेठ । पोखरा महानगरपालिका वडा नंं २६ ले महिला तथा आमा समूहका लागि उद्घोषण र समूह व्यवस्थापन तालिम सोमबार देखि शुरु गरेको छ ।

तालिम शुभारम्भ गर्दै, पोखरा महानगरपालिका वडा नंं २६ का अध्यक्ष नरेन्द्र थापाले महिलाहरुका लागि सञ्चालन गरिएका कार्यक्रमहरु प्रभावकारी हुँदै आएको बताए । महिलाहरुको क्षमता र नेतृत्व विकासका लागि बार्षिक कार्ययोजना बनाई तालिम संचालन गर्दै आएको वडाध्यक्ष थापाको भनाई थियो ।

तालिमले महिलाहरुलाई आत्मविश्वासी र दृढ बनाएको बताउँदै उनले समूह र टोलबाट नयाँ नेतृत्व उत्पादनमा सहयोग पुग्ने विश्वास व्यक्त गरे । उनले अनुशासन र समय व्यवस्थापनमा महिलाहरु अब्बल हुने भएकाले तालिमको सिकाई प्रभावकारी हुने अपेक्षा राखे ।

मसिना कुराहरुको ज्ञान नहुँदा समूहलाई व्यवस्थापन गर्न कठिनाई भएको उल्लेख गर्दै अध्यक्ष थापाले तालिम पछि महिलाले नेतृत्व गरेका समूह सुदृढ हुने विश्वास व्यक्त गरे ।

वडा सदस्य लक्ष्मीदेवी भट्टराईले क्षमता भएकाहरुको भूमिका समाजमा फरक हुने भएकाले सहभागीलाई तालिमले थप सशक्तिकरण गर्ने बताईन् ।

वडा सदस्य सुजता बराल सुनारले क्षमता अभिबृद्धि र उद्यमशिलताका तालिमहरुले महिलाहरुलाई शसक्तिकरण र उत्पादनमा जोड्न सकिने धारणा व्यक्त गरिन् ।

कार्यक्रममा पोखरा महानगरपालिका वडा नं. २६ का सूचना अधिकारी नवराज सापकोटाले व्यक्तित्व विकास र अन्तरनिहित दक्षतालाई प्रस्फुटन गर्न तालिम सहयोगी हुने उल्लेख गरे ।

प्रशिक्षक घनश्याम पाण्डेले ज्ञान हुँदा हुँदै पनि अभिव्यक्तिको माध्यम र विधि जानकारी नहुँदा महिलाहरु नेतृत्वदायी भूमिकामा देखिन समस्या भएको बताए ।

वडा सदस्य लक्ष्मी देवी भट्टराईको अध्यक्षतामा भएको तालिम शुभारम्भ कार्यक्रमको सञ्चालन वडा नं. २६ का कर्मचारी इन्दिरा रेग्मीले गरेकी थिईन् । एक सातासम्म सञ्चालन हुने तालिममा एक सय २० जनाको सहभागिता रहेको छ ।